سعيد فرحاوي

******

عجاجا عفنت رجانا.

يمكن...
يمكن هي زلة دايزة
بلا شوار
او علة بلا وعد بلا حلمة
واهلي حاطة الوقفة
وحنا غافلين ماعندنا شغل
ماعندنا خيار
يمكن الضرب كبير
ولعمر مسرب طويل
ونظرة طوير دايز ماعندو سوق
ماهماه
كمرة
ولاسمرة
ولا نطحة جايلة
في محاين تخمامنا
يمكن هي وحلة
او زربة ماليها تاويل
ماهامها ظلمة ولا صدمة
سايكا اروينتا
بلا لجام
بلا تشمار
هي خيمة لعمر
لما بغا يتسكم
دري هاد الوقت
ليامو عوجا
ضحكتو عرجا
كيتو شباب
حركتو مشية معمشا
مابغات تكاد
مابغات تخبا
هي حماق هاد الزهر
ضحكة زركة
ما عندها عينين
عيبها سكن سعدنا
نكادها عشش فينا
اوزاد من احلامنا اروينة
يمكن هي ريح دايزة
شتا خمجات العيشة
يمكن هي اجراح
سرها اخنز راح
عفنت سيرتنا
اوخلاتنا بطانة
بلارجلين
بلا ودنين
ضحكة ماليها حد
واهلي خلصوا عليها لولين..
واهلي
واهلي..