فوزية اسلاميات

******

*مَعْذُورْ يا بْسَاطِي .....

حلمت حلمة ف زمان الكذوب وصدقتها
نسيت بلي الكذوب ف زمان الحلم يتباهى
شفت نفسي فوق بساط الريح 
تحتي أرض بلا حدود تتماهى
تميلني الريح يمين وشمال
تسلمني غيمة لغيمة ماحلاها نزاهة
قطرة فوق الخد تروي الشفايف والجلد
هوا نظيف يغسل قلوب..الذنب كواها
ف سما المحبين ماتضيق بيك المساحات
ماتعيش حسرة ماتدخل متاهة
مرفوع الراس تجول
لاعيب لاعار لاكراهة
نْسْبْحْ ونْسْبّحْ ف كون من كبرو 
وساع بُطَين قلبي ومن حبُّو رواها 
وانا عايش ف متعة وقف البساط
لاعلم لا استئذان كحل عيني ومن بعد عماها
رماني رمية الكلاب من بعد ماعرف
أني من دنيا .....الكذوب غذاها وعشاها 
لفظني البساط وأنا بريء
ذنبي أني نعيش بقناع من ضيقو عيني غشاها
يالبساط سامح ماتجرح شراعي القاع حنا فيه
ماتزيد همي ماتعصر قلبي الناس مغلوب مساها
برد الشتا عايشينو ربيع خريف صيف
ف الجيب ف القلب والسوء نماها
كسرتي خاطري يالبساط ظنيتك نزيه
تميز القلوب الحيرانة وتكون دواها
لكن ف زمان الكذوب غاب الحب 
وضاعت ملامح وصبح الشك دواها

فوزية بوقريان
17/2/2018