****زمان الجايحة...****
زمان الجدبة...زمان الجايحة
سوالف مقطوعة... وحناجر نايحة
ذياب مسعورة... وكلاب نابحة
مضيومة يا شامة
من كرحتك ديما سايحة...
فينك يا الصايلة...؟؟؟
فينك يا الجايلة...؟؟؟
خيمتنا رابت... وتادها طايحة
من يوم غبتي يا شامة
نوارنا صفار
والنوالة كداتها نار
الكبير صغار
والصغير كبار
والدار ماهي دار
الكنازة كبيرة والميت فار
هذا زمان آخر يا شامة
ما بقات نخوة ما بقاو علامة
الراعي طال نعاسو ياشامة
كسيبة صياحة
خدامة وما خدامة
همة الليل تاكلها بالساهل
ما خدامة ما ردامة
كتاف شقيانة و عركانة
تجبدها من راس القرع
تضرب عليها
بالشبر و بالكامة
ليلهم ياكل نهارهم
و الحاجة هدامة
والضبع يكذب على السبع
و شياطة القسمة
تلعقها نعامة
رباعة سقرامة
على ديالي
وعلى ديالك
كروشهم مفجوعة...تترامى
تريكة ناقصة...ورمرامة
عينيهم على الحق تتعامى...
طاح ظلام الليل يا شامة
لا فتيلة ...لا قنديل
سرق...
نهب...
كذب...
داتني عيني...وشفت منامة
بحور فايضة... ناس عوامة
صهد و برد
خلص و رد
أرا وشد
قامت القيامة...
زمان الجدبة ...زمان الجايحة
زمان التشويكة...والسراول طايحة
زمان العكر ... والخنونة سايحة
حنحن عودي يا شامة
البراح عيط
صربتنا للعز رايحة
هذا وقت الجد
إيد في يد
نبنيو الغد
اليوم عرسك يا شامة
زغاريد و أفراح
ريحة بارود فايحة...
الشاعر محمد السعداني
ليست هناك تعليقات:
إرسال تعليق