Noureddine Fikri

******

سوقْ الأوهامْ

1- انْتيقو في الأرقامْ
ولاَّ في كْروشْنا الزَّاوْيَا
عَمَّرتونا شلَّا كْلامْ
وݣَفَّتنا بقاتْ خاوْيَا
يْـݣولُو الخَيرْ لْكدَّامْ
والأرضْ تحْتْنا هاوْيا
لا ضَوْ كَلْشي مَضْلامْ
والنّاسْ راها داوْيا
باعونا غِيرْ لَوْهامْ
نعاجْ ودْيابْ عاوْيا
يرَبْحو بَعْضْ لَيَّامْ
وغَدَّا الكْراسي خاوْيا
2- باعونا النَّقاباتْ
وَحْزابْنا تْخَلاَّتْ عْلينا
حكومة جَمْعَتْ وَطْواتْ
شَفْنا كْذوبْها بِعَيْنينا
أيّامْ لْمُعارضة تَنْساتْ
وَتَّنْسى شْحالْ ضَحِّينا
أيَّامْ الحَشْمَة وَلاَّتْ
بِينْ الحْساباتْ تَلِّينا
إكراهاتْ وتوازُناتْ
وَكْلامْ كْبيرْ عْلينا
ضرائبْ وزِياداتْ
وفي بْلاصَتْنا بْقينا
زادونا في الحِواراتْ
وفِ السّْلالَمْ ما اتْرَقِّينا
كالونا فِ التَّعْويضاتْ
وْهَذا دَرْسْ لِينا
هَا الانتخاباتْ جاتْ
لَمَكاتَبْهُمْ لَمْشينا
فِ صْنادَقْهُمْ لَفَعاتْ
نْخافوا عْلى يَدّيِنا.

بقلم: نورالدين فقري