Mohammed El Wafi

******

عينيه راكبة ف قفاتو
الصمت خارج من فم محلول
غارز انيابو
ف بحر هامد اصداعو
مكبل ب خيوط
اسداها من عش ارتيلة
فتيلة
طافية
شاعلة
واش هاد الحالة
روسنا ف رجلينا
ويدينا ف عينينا
تالفين
مودرين
فاتلين
بحال شي وكرف من شي
واكلين
طالعين
هابطين
بحال قنافد ملسا
تقللب فين ترسا
وتعللق وسخ جلدها
عل كل اكسا
م شي بحال شي وحدين
دخلو ووحلو بحال الديب
اشكون يقطع ديل الدل
والشمتة
واخا كاينة الفلتة
الزمان اصعيب
والسوايع بهدالة
طاحت البگرة والصمعة
قواو اجناوة
والحجام ولخوت
فاين دارت بيهم ليام
ياك تعللمو لحسانة
فيك انت وانتي وانا
طيحو الميزان
خلاونا بحال ليتاما
شي نادم
وذي دايرين ليه اكمامة
ها خطي
ها خطك
اتساواو لخطوط
ف زمان لبحوط
اكتر التحياح الخاوي
اللي م يضر م يداوي
بحلق فيا نبحلق فيك
م تليق ليا م تليق ليك
واخا دايرين لا كليك
الوقت ابغات تردنا ابحال ابحال
الله ينعل اللي م يحشم
وخا ف يديه اقلم
دايز يقسسم بلا م يخمم
وحالف لا رد لسانو
يفرق اللغا
يكللم البهما
ويرد لعما.. يشوف ف الضلمة
محمد الوافي