عبدالله التويس أبوفيروز

******

غير..... داوي
---------------

من كان يڭول
ديك اتزغريته 
لمْفرڭْعه من لوْلاده
شربت فرحتها بلا عطش
وْلَوْضو بلا عِباده
ولمَعمولْ
كان زْياده
فتحت كتابها ل ادموع
باب يكب ف باب
لعتبه خيط بلا راس
وف محراب لحب
يحلى اركوع
وفْ حسابو
يتلف لمجموع
واخا تكون الظلمة زاهية بلا شموع
ياكْ لبحر كولو اشتا
لبْكا عياط وستْ لْفرحة
لّي قماطها فَرخَة
باغية تْربّي الريشْ
ؤ دوكْ دْموع من الصّرخه
بْقاوْ ف رقْبَتْ اشهادة
شاهد مخْدوع
زَرّيعتْ لحبْ
كتّانتها حْصاد
ؤ لعمر يجْري
عَفْطه ف لما
وعطْفه من لْما
ولحُب ريح
ينفخ ف حرف الضّاد
ؤ ف كل حلمة
كلمة
تلبس من اسما لونها
وتحسب لڭمرة اربيع
ؤ كل نجمة
نغمة
تولد لْميعادْ
من كل لون فرحَه
ف كل فرحه / ميلادْ
ترسم وَجَهّا وَقْتْ
يْنَجْ بين صباح ولعشية
شهدة
تسيل من خدود لموج
محبّتْ لبْحر
ؤ مَشية ناصلة النية
بين هْبوطْ وطلوع
وسكات قْرايَه
يزرع عشقو سبول الشمس
ويد ف يدْ
تسخن لحكاية
تحمل لورقة
وشكون يڭول
لفرحة تبكي بادموع
وتولّي ارهينة لْعزّاية

البوهالي : 2018.02.16