"انا والحلمة"
علاش
يا الحلمة تحلميني
وانا صاحي..
و بغيتي تصالحيني
مع فْراحِي
نكذب عليك يا الحلمة
إلى عطيتك شي كلمة
ووعدتك ننسى جراحي
يا الحلمة تحلميني
وانا صاحي..
و بغيتي تصالحيني
مع فْراحِي
نكذب عليك يا الحلمة
إلى عطيتك شي كلمة
ووعدتك ننسى جراحي
لوكان بيديا آه لوكان
نخيط جفون عَيْنِيَّا
ندمص ونتيك الأحزان
نختار منهم أبهى كِيَّة
ونزاوڭ ف الليل ونجومو
ندفڭ بحر الهم
واللي شاط نعومو
ونحزر الوقت تولي ظلمة
ونديها فيك يا حلمة
وتْطَلقي سراحي
نخيط جفون عَيْنِيَّا
ندمص ونتيك الأحزان
نختار منهم أبهى كِيَّة
ونزاوڭ ف الليل ونجومو
ندفڭ بحر الهم
واللي شاط نعومو
ونحزر الوقت تولي ظلمة
ونديها فيك يا حلمة
وتْطَلقي سراحي
ها العار يا الحلمة.. ها العار
وهاد النوم اللي جفا عينيا
كيف نرضيه
ها العار يا الحلمة.. ها العار
جبهة الوقت شاعلة نار
والرڭاد ما قديت عليه
لوكان بيديا القرار
ناخد بيدك ونتيه
نخوي دشر... نعمر دوار
نقطع من لبحر لهيه
نزاوڭ ف الڭانة..
ننظم فيك اشعار
واللي بغتيه نعطيه ونوفيه
ونحلمك وتحلميني
تطلقي سراحي
ونرتاح وترتاحي
وهاد النوم اللي جفا عينيا
كيف نرضيه
ها العار يا الحلمة.. ها العار
جبهة الوقت شاعلة نار
والرڭاد ما قديت عليه
لوكان بيديا القرار
ناخد بيدك ونتيه
نخوي دشر... نعمر دوار
نقطع من لبحر لهيه
نزاوڭ ف الڭانة..
ننظم فيك اشعار
واللي بغتيه نعطيه ونوفيه
ونحلمك وتحلميني
تطلقي سراحي
ونرتاح وترتاحي
عفاك يا الحلمة عفاك
انا مابغيت حلم بلا مذاق
انا ما ولفت صباغة
انا ما ولفت زواق
انا ما ولفت مراغة
ف رحبة "النفاق"
رحميني يا الحلمة
انا ما ولفت ملاغة
ما انا مشتاق وعاد داق
نعبر خطواتي
ف مشايا ورواحي
حاكم ف دمعاتي
ما نبيع ما نشري ف نواحي
انا مابغيت حلم بلا مذاق
انا ما ولفت صباغة
انا ما ولفت زواق
انا ما ولفت مراغة
ف رحبة "النفاق"
رحميني يا الحلمة
انا ما ولفت ملاغة
ما انا مشتاق وعاد داق
نعبر خطواتي
ف مشايا ورواحي
حاكم ف دمعاتي
ما نبيع ما نشري ف نواحي
انا يا الحلمة
ما بغيت حلم مسروق
ما انا ف الضيم معشوق
انا يا الحلمة
بغيت نحلمك بالذوق
وتشكريني منين
يطلع صباحي
ما بغيت حلم مسروق
ما انا ف الضيم معشوق
انا يا الحلمة
بغيت نحلمك بالذوق
وتشكريني منين
يطلع صباحي
انا يا الحلمة
ما بغيت نحلمك بلا خاطر
نومي على قد الحال
ڭلبي فايض وعامر
همومي كثرت ولات جبال
طريقي شوك ومسامر
شحال قدي نعاودلك وشحال
راني يا الحلمة غير صابر
ما بغيت نحلمك بلا خاطر
نومي على قد الحال
ڭلبي فايض وعامر
همومي كثرت ولات جبال
طريقي شوك ومسامر
شحال قدي نعاودلك وشحال
راني يا الحلمة غير صابر
الحلم اللي ربيتو بدا يدبال
نزيد نسقيه ما بقيت قادر
ما قدرت نعيش الخيال
ما قدرت نزيد نغامر
ما قدرت نطير معاك يا حلمة
ونسافر
لقتيني تهديت.. تكسرلي جناحي.
نزيد نسقيه ما بقيت قادر
ما قدرت نعيش الخيال
ما قدرت نزيد نغامر
ما قدرت نطير معاك يا حلمة
ونسافر
لقتيني تهديت.. تكسرلي جناحي.
علاش
يا الحلمة تحلميني
ونتي
تعرفيني نفيق ونندم
لوكان اعلمتيني
لوكان شاورتيني
نڭوليك آش بغيت نحلم
يا الحلمة تحلميني
ونتي
تعرفيني نفيق ونندم
لوكان اعلمتيني
لوكان شاورتيني
نڭوليك آش بغيت نحلم
انا نحلم بيك نتا
ونتي وانا
ف لمة كبيرة
فيها لوفا
واسرار كثيرة
نحلم بالصفا
ينوض ف لقلوب لمريضة
تشفا
تزهر تولي وريدة
ونتي وانا
ف لمة كبيرة
فيها لوفا
واسرار كثيرة
نحلم بالصفا
ينوض ف لقلوب لمريضة
تشفا
تزهر تولي وريدة
انا نحلم بالوفا
تزول الغمة والتنهيدة
والصدق يكبر ويدفا
يسكن لقلوب تولي سعيدة
تزول الغمة والتنهيدة
والصدق يكبر ويدفا
يسكن لقلوب تولي سعيدة
انا نحلم بالجفا
يزول من بين الناس
ما نشوف اقدام ب لحفا
وناس تعاني بلا قياس
انا نحلم بشلا وشلا
وف الحلم ما نتفلا
وكيف يا الحلمة يجيني النعاس
يزول من بين الناس
ما نشوف اقدام ب لحفا
وناس تعاني بلا قياس
انا نحلم بشلا وشلا
وف الحلم ما نتفلا
وكيف يا الحلمة يجيني النعاس
ومزال صوت القرطاس
ومزال أطفال تموت
ومزال أطفال تموت
ومزال ناس بلا إحساس
ومزال لعداوة بين لخوت
ومزال لعداوة بين لخوت
إلى نعستي نتا وأنا ولاخر
وشخرنا... وحلمنا
وشخرنا... وحلمنا
شكون يسقي لغراس
شكون يسمع الصوت
شكون يسمع الصوت
انا نحلم بشلا وشلا
وف الحلم ما نتفلا
وف الحلم ما نتفلا
انا نحلم بخريطة ما عليها عساسة
ما فيها عداوة ما فيها حدود
ما فيها عداوة ما فيها حدود
انا نحلم بالحروب تولي مدرسة
يتقطع حس البارود
يتقطع حس البارود
انا نحلم بسياسة
فيها الأفعال تشبه الوعود
فيها الأفعال تشبه الوعود
انا نحلم بشلا و شلا
وف الحلم ما نتفلا
انا نحلم بحلم غير عادي
وف الحلم ما نتفلا
انا نحلم بحلم غير عادي
انا نحلم ببلادي
جنة فوق الارض... ياقوت
انا نحلم بالجاي والغادي
فيها مبهوض
أنا نحلم بولاد بلادي
ف بحور بلادي
ما ياكلهم الحوت
جنة فوق الارض... ياقوت
انا نحلم بالجاي والغادي
فيها مبهوض
أنا نحلم بولاد بلادي
ف بحور بلادي
ما ياكلهم الحوت
هادي شروطي يا الحلمة
ولا بدلي الساعة
آجيني ف الحلم الجاي
نقدر نعطيك سوارت الطاعة
ونحلمك حتا تعياي
ولا بدلي الساعة
آجيني ف الحلم الجاي
نقدر نعطيك سوارت الطاعة
ونحلمك حتا تعياي
هادي شروطي يا الحلمة
ولا بدلي الساعة
هادي شروطي يا الحلمة
الى بغيتي نحلمك بقناعة.
ولا بدلي الساعة
هادي شروطي يا الحلمة
الى بغيتي نحلمك بقناعة.
لشهب سعيد
ليست هناك تعليقات:
إرسال تعليق