Mohammed Elmouadden

*****

واهيا لبنات يا لخواتات
ابكيو معاي راه بويا مات
واهيا لميمة واهيا لعميمة
ابكي معاي راه الموت جات
والخيمة خوات وفين نبات
واهيا خويا وا الزمان حنات
ياك أ ليام امحمد بوسلهام
زين لمقام في السربة علام
على سرج عودو شاد لجام
عودك لدهم حنحان ما حران
يا زين الفرسان يازير العدنان
يا مول الجنان يا مول الفدان
امحمد مول لثام يعطي لحكام
راه رحل ما كمل شهر الصيام
يا امحمد يا الناصب وثاقو
يا لمزمم اوراقو بسماقو
يالحالم في نعاسو وفياقو
فاتح البيبان اللي ضياقو
يا لمسكت اللتيم بنفاقو
امحمد يا مول السيف لمهند
امحمد راه لميل عليك مسند
يالمجهد تعطي وتمد ما تشد
امحمد جد اولادي هو مرادي
يا ربي يا الهادي طار رقادي
ونار فراقو في قلبي تاكدي
بويا يا الداق وتادو في بلادو
يا الموصي ولادو على حفادو
يامعمر زادو بقوتو في صيادو
لمن نقول السلام نحكي كلام
طاح الظلام الصفا غطاه لغمام
زين لجلسة وزرعو في درسة
يسبح ويصبح يصلي الخمسة
على نجمة الفجر طالق العسة
امحمد مول لمطامر يا لمغامر
راه تليسك عامر بالقمح الثامر
يا الصابر في حقو يا لمكابر
يالحاضر يا الداخل ف لخاطر
راه قلبي عامر ندب عليك بشواقر
ولفت نقلب شواريك يا لمسافر
مالك غدرت صديتي وما تشاور

محمد المؤذن مؤسس ورئيس جمعية كازابلانكا للتراث الشعبي - المغرب