Nourlyakine Ettoumi

******

لَاشْ وَحْدَكْـ

اتْوَحْمَتْ وُ ثَقْلَتْ
اتْعَذْبَتْ فِ الْوُلَادَة
إِيلَا اتْلَفْ مَ وَلْدَتْ 
لَا اتْلُومْهَا فِ الغْوَاثْ
وُانْتَ مَنَّكْ الْحَالْ اثْبَتْ
نَافَخْ رِيشْ السَّادْجَاتْ
اتْݣَوَّلْ فِيهَا وُتَشْمَتْ
هَذَا طَيْش شَابْ وُشَابَّاتْ
احْمَاقْ ارْجَالْ وُاعْيَالَاتْ
تَقْضِي حَاجْتَكْ وُتَسْلَتْ
امْوُݣَّفْ اخْشُبْ فِينْ اتْبَاتْ
خَايْفْ لِيلْتَكْ مَنَّكْ تَفْلَتْ
وُالَّعْقَلْ عَامَرْ وَسْوَاسْ
وَلْلَاتْ اقْصِيدَة ابْلَا سَاسْ
مَلْلِي ارْسَاتْ وغَرْزَتْ
مَ احْسَبْتِي لِيهَا اقْيَاسْ
ݣَايْلْ انْتَ هُوَ الرَّاسْ
تَحْكَمْ اشْكُونْ الصَّالَحْ
اشْكُونْ الطَّالَحْ
يَا صَاحْ اكْثَرْ فِيكْ انْوَاحْ
التَبْرَاحْ ، التَّطْوَاحْ
زَايْدْ الْمَلْحْ عَالَّجْرَاحْ
نَاسِي اتْكُونْ اتْسَامَحْ
اتْنَقِّي الَّعْقَلْ وُتَݣْطَعْ الْغَلْ
اتْخَلْلِي النَّفْسْ اتْعَزْ مَ تَذَّلْ
رَا لَبْحَرْ دَايْمْ يَطْلَعْ وُيَنْزَلْ
وُالْوَادْ حَالُو يَنْشَفْ وُ يَحْمَلْ
شُوفْ إِيلَا بَاغِي تُوصَلْ
مَ يِهَمَّكْ أُوطَى وُ لَ اجْبَلْ
خَلْلِيكْ مَنْ لِ يَمْدَحْ وُ يَنْعَلْ
حُطْ اعْلَى الصَّحْ ارْجَلْ
مَ اتْغَرْ اتْخَلْلِي رَاسَكْ قَاصَحْ
عَالدْوَامْ الْحَقْ بَايْنْ وَضَّاحْ
يِبَيَّضْ اظْلَامْ الْلِيلْ بِاصْبَاحْ

نوراليقين التومي