Noureddine Fikri

******

عْلَ فْراقها ما نْويتْ

ݣالوا نْسَ ديك لَمْرا
ݣُلتْ حاولتْ حتَّى عْييتْ
ݣالوا نْساها بْمَرّا
ݣُلتْ حاولت ما قَدِّيتْ
حُبّْها ما بْغا يَبْرا
نتفكَّرْ مَلِّي نْݣولْ نْسيتْ
بحال إلى قُدّأمي حُفْرَا
نْطيحْ مَلِّي نْݣولْ حْضيتْ
عْرفت لْحب أول مرَّا
شَفتها عادْ بْديتْ
ݣلت كيفْ جْرا وطْرا
وقْبل غِيرْها ما حَبِّيتْ
شَعْلَتْ في قلبي جَمْرا
ومن بْعادْها شْكيتْ
حبّيتْها من أول نظرَا
وبعد لَعْطش رْويتْ
مْعاها جاتْ لْبُشْرا
ونْسيتْ ما قاسيتْ
قالوا لي عْليها هَضْرا
وعْلى كْلامهم مَ دِّيتْ
سَمْهم قطرا قطرا
وعْلَ فْراقها ما نْويتْ

بقلم: نورالدين فقري