عبدالله التويس أبوفيروز

******

غير....... داوي
-------------------

فوكاش
يترفع عليّ لقلم
يتعقل لسان
ويتسد هاد لفم
عين لكامرا
يلبسها لبياض لكحل
ويتحل
لعقل
من شكال التسوال
ياك لّي طال
تيقصار
وهاد لوجود ف ازمان
اخيال
هانايا
بلا نهاية ف اللانهاية
وجود معدوم
ؤ عمري امْضارع
يتْسارَع
يكون ڭد لّي كان
ولّا يمكن يكون
ف لّي ما يمكنش
وجود اتسلّط علي
واربطني ب احبل سرّي
وابقا سرّي يانايا
بلا اجهر
واشحال اضحكت
بلا منهضر
ف وعي محدود .... ماواعيش
ولْمدلول بلا دال .... وانا ماقريش

فوكاش
هاد لفياق يْڭر بانعاسو
ويبان داك لهارب من لحلمة
يتّفرز من اتراب نحاسو
ؤ ف كاسو
نشرب تغميضة موّال
يا لّاه نفيقو
واللعبو بلا قياس
وخلٰي زمان يشهد
راه اتْحدْ لْحَدْ
واتّعڭدْ
لما ف صلْبْ اتراب
ؤ غاب
لهلال نْهار اتّسْهلْ
ؤ وقفت علاش
ف نغانغ كيفاش
وانا ما داري
ولما ديما جاري
ؤ مكينش علامن اتعوّل
مكيييييييييينش آش تڭول
ؤ ف ذات اصدور
يتْصَيّر لحق من لباطل
واشهادة انهار
ولحق ف عين لعقل ...عاطل
فاللا معقول حاصل
ولعار عار
ف كل واد حامل
لحصول وما فيه
ولّا فيه شلّا فيهات
حتى كلشي ابهات
ولفتيلة اتڭات
وادموع دخان
واشحال بكات الشمعة
وف احجر ظلام اطفات / شعلات
شعلااااااااات .

أبوفيروز عبدالله التويس