هبولة عيسى

*****

ولاف الدهاري....!

شحال گدك تحسب و تعيد
يا لعابر الشريط بالگامة

غادي تسهى و تنقص و تزيد
و يغلب الحساب على الفهامة

شرك الدوم
خليه يسكر

عمر الشريط
يتفتل خضر

سوى يدفى
على حر الجمر

خليه يبرد على وجه الصر
ؤلا تفوت فوق منو غمامة

كباب الكافة
لغنمو وافي

بحال نهار مطير
بحال نهار الصافي

ضلوع الدومة
يدير منها حصير

من عواد گراز
يشعل عوافي

وناسو نيرا
ونظيم القوافي

يا لمكمد ف فراشو دافي
وصابح يفك في الحلامة

كباب الكافة
مونتو في قراب

في جنب الحافة
لسانو يرطاب

يهوني بغناه ويذكر الحباب
وقتاش يشوف حبيبتو شامة

كباب الكافة
ولاف الدهاري

ف قرابو زلافة
للكلب الضاري

متيق بضرافة انا باري
تعود نادم متنفعك ندامة

ولاف الدهاري
عنايتو في راسو

ليلو قفاري
كيطيب نعاسو

يا الخواف من خيالو ووسواسو
ترعدو الدجاجة تفزعو الحمامة

يا لحاسب
الدهاري بلادو

قتة برواگ
تعليلو وسادو

صوت الغرناگ يقصر رگادو
غوات بيبط ؤموكا وهامة

كباب الكافة
ما يخاف حناش

ما يولي اللور
ما يگول بلاش

يفتش الجحور ما تگول علاش
طلب من الله يرزقو السلامة

بقلمي هبولة عيسى

كباب..بالباء مشددة من كبة
الكافة...هي الكبة ديال الشريط مني كتكمل