Nour Abouchama Hanif

***

سِيرْةْ الطّالعْ
...
الطّالعْ منْ عَينْ لْـڭَـمْرَة ،
لْڭَـبْضَة عَنْدُو جْنَاحْ ...
كَفّو مْصِيدَة ؤُ صْبَاعُو ڭَـمْحَاتْ ...
الصْبَاح فَكْ خْبَالْ الضّوّْ ،
ؤُ حَطْ فْ صَدْرُو شْعَاعْ ...
شْكُونْ هْنَا شْرَى ؟
وْ شْكُونْ لْهِيهْ ، بَاعْ ...
الطّالعْ منْ عَينْ لْـڭَـمْرَة
منْ بكْرِي ؤُ هُوَ وَطَنْ ...
جَا لْيُومْ يفْطَرْ لْقَا لغْدَرْ ...
لَابسْ تّا هُوَ وَطَنْ ...
عْبَايَة مَرْشُوشَة حْبَقْ ...
ؤُ عْبَايَة مَغْشُوشَة نْبَقْ ...
لفْطُورْ دّاتُّو رِيحْ ...
الطّالعْ ، غَمّسْ حَقّو فْ الشّيحْ ...
حِيتْ لْبَارحْ نْسَا وْ عَنّڭْ لْيُومْ ...
ظَنّو صْطَيْلَة لْقَاهْ مُوكَة ،
لابْسَة قْوالبْ الشّومْ ...
وَاشْ لْقوالبْ نْسَاتْ حْلاوتْهَا ...
ؤُ كْفُوفْ النّعْناعْ شَاختْ طْلَاوتْهَا ...
السّاقِي مسَرّحْ رجْلِيهْ
ؤُ كْلَامُو مْسَاسْ ...
الضّيفْ ، فْ شْرَابُو
مَا غَنّى لُو رَاسْ ...
الطّالعْ مُولْ الدّارْ
وَلّى عَسّاسْ
شَادْ لَرْضْ منْ بزّولْتْهَا
لا يحَلْبُوهَا عَطّاشَة
طَاحُو الصْبَاعْ
ؤُ بْقَى ضَرعْ لالّة فْ التْرابْ
لحْلِيبْ نَهْبُوهْ دْيَابْ
عْطَشْ الطّالعْ سَرّو دْلُو ...
ضَاعْ الدّْلُو ؤُ بْقَى لحْبلْ
الذّمّة لْيُومْ فْ لْكرّاشَة
جْبَدْ لْغَيْسْ مَا جْبَدْ سَقْوَة
حَظّو منْ السْقَا
نَخْوَة ...
وَا الطّالعْ ... وَا الطّالعْ
وَاشْ النّخْوَة تْعَيّشْ
هزْ عَيْنُو للسّْمَا
حَطْ يِدّو علْ التّْرابْ
غَوّتْ فْ وْجَهْ الظْلامْ :
النّخْوَة إيلَا مَا ڭَـطْعَتْ لْحَمْ
تنْتَفْ ؤُ تْريّشْ
...
نون حاء