الرجولة:
سولت صديقي عدولة
اشنو هي الرجولة؟
ضحك وقال بسهولة:
-""حل عينيك ها البادر ها الشلاغم
مالك تخلطو ليك العرارم؟"
جاوبتو هذي علامات الفحولة.
-"" الفحولة الرجولة بحال بحال
بلا كترة الهدرة والسؤال""
- خاصنا نميزو امعيزو
الرجولة عقلية ف سلوكنا كتظهر
ما شي في القلدة والمظهر
اللي يبرز عضلاتو على المرا
يمارس عليها الحكرة
ماشي راجل هذاك ذكر.
اللي يبقى ناعس
وعلى الخدمة يتقاعس
هو أصح من بغل
هي بوحدها هازا الحمل
ها الخدمة ها لولاد
وهو غير الماكلة والروكاد
هاذا راجل؟
الرجولة هي النخوة والكرامة
والاعتزاز بالذات والشهامة
الرجولة حب و اخلاص
ونستافد ونفيد الناس
ولا تنسى:"اليد العليا خير من اليد السفلى"
عمر بنحيدي 22/11//2017
ليست هناك تعليقات:
إرسال تعليق