Wafaa Oum Hamza Jlida

***

***نڭول كلمتي***

حليب لفهامة فلڭط
ف عروق لبزولة كرطط
خرجت جهالة 
طالقة لسانها
تتمختر
بروالة مع توالة
واتحل لفم
بلا حدود
لقفل تْزَم
والسر ف ڭلبو ممدود
لعيب مكسل على كرسي
ومْڭرفط
لعقل ساح
بين احفاري لحيرة
لقلب موّجع
من لهيب لغيرة
حلف بِ يمينو
يطلق يْمانو
والنشبة سكناتو صغيرة
لحلم كره راسو
قلبو شاعل بركان
الضيم عمر كاسو
من براد مشحر احزان
حفر بيديه قبرو
وفيه غبر نحاسو
كلشي ف زحام لخيال تالف
ؤ من علافة الظلام عالف
وبيض لحضانة
خرج مارج
ازمان أجفل عودو
ماحكم لجامو
ولّي جاي كولو ضباب
محين غمامو
ماعرفنا اش يكب
سراب
تراب
ولا عذاب
هتر لكلام
بلا معنى ينطق
لّي اسمعو مافهمو
يقول عليه أحمق
يبست عروش لحروف
وجهضت لمعاني
توابع اصْروف
لفهامة
نطقت اشهادة
وادّفنت من نهار الزيادة
ومشات ف واد لمنامة
وبقات لولادة
تزاوڭ ف اشهر يتّسهل
ؤ لعقل يلعب اسويرتي مولانا
وآش هاد لحال جانا
باع حدودو
تلف اصل جدودو
وواد لغفلة دانا
مابقى مايتخبى
ؤ دابا
دابا تشرق الشمس من غربتها
وتمشط لحياة اسبولها
وتعنّڭ ليلتها
حجّاية ف صدر لكتاب