Med Zerouani

***

حفنة من عظامي

هزيت حفنة من لعظام
أورشيت بيها التخمام
خرجت مني شلا نغام
أتفاجي عل الروح
ؤ سار فيا لكلام
وبدأت حروفي تشوف ف لخاطر
ؤ ولدت قصيدة راضعة لغيال
شاربة حليب الناكة
هازها الحال

راكبة على ظهر لمعاني
اتبخر ف تقاف لقوافي
ؤ عاد اللسان المخطوف
يجري و يجاري طالب لفكاك

يكتب و يمحي ف لوح الطلبة
داير للمعنى اعلاش يرجع

سفيت الهضرة سفوف
باش الحرف
ألي نفسو باردة
يرجع ليه الشان الهمة

ويحيد الدل عالكلمة البايرة
ويعود فحل ويتقال عليه
شلا كلام

ؤ شديت عرايا وكسيت الجوف
امكمد عظم الحكمة راضي بلقاسم

أوشكيت بهبال لحروف
عدت نهز ارجل وانحط ارجل
باغي لراسي الطايلة بيها نوصل

ؤ سارت كليمات الجوف
بيا اتعكز وانا داوي نوكي
ساكت ندوي

انعيط من شعاب لقلم
وااااا هيا لحروف حثا لين
وانت تشيري بتخمامي

ؤ حثا لين وانت امصبراني
وانا على عتبة الجدبة نشكي

خليني نتشعبط
في جلايل لقصيدة
عل لحروف انبري

أدعيتك للمجدوب
لا تعكس فيا تخمام

سيري أدعيتك للحق
هو ياخد فيك الحق

ياك ما بيتك عريان
ماخليتك عليا فكعانة
ماحرزت اعليك قلم ودواية

ما خليتك دايعة
والناس فيك دواية

ما خليتك ف حصدية
ايشطبوك النكالة

ياك صريتك ف لكاشوش
حتى خمر فيك لكلام

ياك دفيتك ف الخاطر
وزرعتك قمح عدتي خرطال

ونتيا تشطيب من نكاسة لعمر

ف جلايلي امشعبطة
مكزورة الظهر

زيديني سري انا...
ألي داير فيك راسي
أنا قاري فيك لخير
وانت حرقان بعوافي

امبيتاني حداك
مكثف
مغلف
امزيدني نحلف

بالحق إيلا أبقات فيك
اجي حتا لهاد الخاطر
ؤ باتي فيه

بقلم محمد زرواني
زجل من شعراء العرام