Choaib El Harougui

***

♦️زجل : مْـوَاجْ عْشَقْهَا تَـتْـقَلَّبْ..!♦️

مَاعْرَفْتْ كِيفْ نَنْسَاهَـا،،
وْهِيَ السَاكْنَةْ فَ لْقَــلْبْ..

وْكُـلْ مَاقَـلْتْ نَنْسَاهَـا،،
قَلبي لْمَسْخُـوطْ ،،
يَبْــدَى يْسُـوطْ ،،
وَيْشَنْ عْـلِيَّـا حَـرْبْ..!

الـرُّوحْ تَتْعَـذَّبْ،،
وَالـنُّومْ عْلِيَّا يَهْـرَبْ،،
وَلْكَبْـدَةْ تَـتْـشَوَّى،،
وَمْوَاجْ عْشَقْهَا تَتْقَــلَّبْ..!

وَنَا واقَـفْ فَ مْكَانِي،،
مَاقَادْ نْزيــدْ..
ماقادْ نَهْــرَبْ..
ماقادْ نَكْــرَهْ..
ماقادْ نَغْضَـبْ..
ماقادْ نَتْكَـلَــمْ..
ماقادْ نَكْــذَبْ..،،
وَنْقُولْ مْحَبْتِي لِيـهَاخْرَافَةْ،،
وْعَرْضْ لْحَايَطْ بِها نَضْرَبْ..!

وَنْمُوووووتْ ...وَلاَ نَـرْغَـبْ...

لمَْحَـبَّةْ مَاتْـجِي بَحْـزارَةْ،،
وَالشَّاهَدْ رَبِّي بَلِّي فَ لْقَلْبْ،،
لَمْحَبَّـةْ ثَابْتَـةْ..
وَالرّْغِــيـبْ ...
بَاشْ تْرَجْعِي لِياَّ مَانَرْغَبْ...!

نَفْسي مْخَاصْمَةْ مْعَ قَلْبي،،
وَمَانَــطْلَــبْ...!

رُوحِـي كُلْ يُـومْ عَطْشَانَــةْ،،
وْمَانَــشْـرَبْ...!

لْقَلْبْ لْعَاصِي نْـعَـدْمُوا،،
وْمَايْدَلَّلْنِي غْرَامْ وَلَا حُبّْ...!
لَغْرَامْ لَحْقِيقـِي عَــزْوَةْ..
شَانْ وْهَمَّهْ وْفَخْرْ وْقُـرْبْ..!

النَّفْسْ كْبـِيرَةْ... وَنْـحَبْ..
لَعْقَلْ فْ حِيرَةْ...يَـارَبّْ..
وَلْقَلْبْ الْعَاصِي،،
يَتْحَيَّرْ..يَجْذَبْ ..وَيْسَبّْ..

وَنْمُــووووتْ...نْمُووووتْ ...
وَنْمُــوتْ عْليــهَا...
وْمَانَــحْـــدَرْ الــــــرَّاسْ،،
وَلاَ نَــطْلَـــبْ...!

مَامَتْعَـوَّدْ نَـرْغَـبْ..،،
وَلِّي فَ لْقَلْبْ فَ لْقَلبْ..!

مَامَــتْـعَــوَّدْ نَـرْغَـــبْ..،،
وَلاَ نَـطْلَـــبْ..!
الطَّــلْـبَةْ عِــيـبْ فَ الْحُــبّْ..
وَخَّا مَاعْرَفْتْ كِيفْ نَنْسَاهَا،،
وْهِيَ السَّاكْنَةْ الرُّوحْ وَالْقَلْبْ..!

ومضة من وحي اللحظة
الدار البيضاء 19/05/2017
---بقلم ذ شعيب الحروكي---