شعيب صالح المدكورى

شَلَّا كْلَامْ
***
لَكْلَامْ شَلَّا ؤُ شْحَالْ
مَ اِگَدُّهْ وْرَاقْ وَ لَا قْلَامْ
وَ لَا حَتَّا اَلَفْ مْقَالْ
مَ بْقَا مَ تْفَسَّرْ مَنْ حْلَامْ
وَ لَا تَصْلَحْ مَنْ خْصَامْ
وَ لَا تْخَطِّيطْ وَ لَا تَخْمَامْ
وُ لْحَالْ هُوَ لْحَالْ
شِي بَغِيهَا تَزْيَانْ
ؤُ شِي فِ لَغْوَاضْ غَطْسَانْ
شِي اِفَكَّر مَزْيَانْ
ؤُ شِي يَجْرِي جَرْيَانْ
طَاحَنْ لْخُوتْ فَرْحَانْ
وُ لْحَالْ هُوَ لْحَالْ
وَاااا رْگَبْ أَ لْعَايَقْ
وَ نُوضْ أَ لْفَايَقْ
رْضِتِ تْعِيشْ فِ ضِيقْ
وْ لَا انْتَ لِيهَا عْشِيقْ
حْسَبْتِ عْدُوكْ صْدِيقْ
ؤُ دَرْتِي مَنُّو وْثِيقْ
ؤُ لْحَالْ هُوَ لْحَالْ
وَااااا فِينْكُمْ أَ رَجَّالَة
رَاهْ رْجَعْنَا حْوَالَة
زْرِيبَتْنَا رَجْعَتْ نْوَالَة
ؤُ لَحْمِيرْ فِينَا رَكَّالَة
حَالَتْنَا مَ هِيَ حَالَة
مَ بْقِينَا عْلِيهَمْ عَوَّالَة
ؤُ لْحَالْ هُوَ لْحَالْ
وَقْتَاشْ يَطْلَعْ نْهَارْ
نْشُوفُو فِيه دَاكْ لْغَدَّارْ
ؤُ نْعَرْفُو كُلْ شَفَّارْ
يَتْحَاسَبْ ؤُ نَمْحِي لْعَارْ
ؤُ تْبَانْ دِيكْ لَسْرَارْ
ؤُ يَتَقْهَرْ كُلْ حَبَّارْ
بَاشْ يَتْغَيَّرْ لْحَالْ
شِي مُوتْ عَلْ لَوْلَادْ
شِي عَلْ لْخُبزْ فِ لَجْهَادْ
لْعِيشَا حْرَارَتْ فِ لَبْلَادْ
ؤُ لْهَمْ ؤُ لْحَگْرَا زَادْ
تْحَرْگَتْ لَگْلُوبْ ؤُ لَكْبَادْ
بِ سْبَابْ دُوكْ لَوْغَادْ
ؤُ لْحَالْ هي لْحَالْ
***
شعيب صالح المدكوري
تامسنا 20.11.2017