Nour Abouchama Hanif

***

عْلَى التّالْتَة ، نْعَوّلْ
...
فِينْ نخْزَنْ هَادْ لْغَيْمَة
وَانَا عيدْ بْلَا جلَابَة
بْلَا عْطُورْ
...
...
كُونْ لْمَا كَانْ خَيْمَة
كُونْ عِيدِي سْقَا لْڭـرّابَة
وْ غَنّى عَيْشُورْ
...
أنَا كتْبَة بْلَا سْقَفْ
عْلى كْتَافي نَابتْ ڭـحْوانْ
ف كَفّي رَا ڭدْ دُخّانْ
صْبَاعِي طْيُورْ
ؤُ لْعَنْقَا ، مَا فَيْقَاتْ سْحُورْ
...
نْفِيقْ أنَا عْلَى حْجَرْ
نَابتْ مَرّة كرْكَازْ
مَرّة ، شُوكْ السّدْرَاتْ
نْبڭـْـهَا ، تْبَخّرْ غَيْماتْ
صَلّاتْ عْلَى الرّوحْ غَيْبَة
و خَلّاتْ لْكَسْدَة ادّورْ
...
لْكَسْدَة وْشَـــامْ
قْبَرْ بْلَا ظَلْ
مَاهْ ، نْشَافْ دَايمْ
ؤُ زَرْعُو ، طَلْ
جِيتْ نْطُلْ
عَضّاتْنِي عْڭـاربْ
غَطّاتْنِي تْرَابْ
نْسَاتْنِي دْهُورْ
...
شْكُونْ يفَيّقْ الصْبَاحْ
و الصْبَاحْ خْمِيرَة
نْسَاتْهَا لَالّة مِيرَة
عَجْناتْ صْبَاعْهَا
خَلّاتْ خُبزْتِي فْطِيرَة
ڭـمْحْ الصْوَابْ
عجْنَاتُو لبْكُـــورْ
...
الصْبَاحْ مِيعَادْ
ؤُ كَلْ صْبَاحْ
وَاشمْ دْرَاعُو مِيـــــلادْ
جِيتْ نحْلمْ نْضحَكْ فِيهْ
طَاحْ من الصْبَاحْ قُبُّو
خَيّطتْ قُبّي
بْشَلّا هْضُـــورْ
...
لكْلَامْ رِيحْ بْلَا كَسْدَة
و الرّيحْ
تخْرجْ منْ صْبَاعْ لوَقتْ
مْرَايـــــاتْ
وحْدَة تْنَجْ لِيكْ سلْهَامْ
ؤُ مْرَايَة ، تبْنِي لِيكْ قْصُورْ
...
التّالْتَة ، تمْشِي حَافْيَة
ترْوِي عْطَشْ الزّرْبَة
تْغَدّي جْلُودْ لْـ ڭـَرْبَة
تسْقِينِي عْتِيقْ الصّهْبَا
ادّوّخْنِي دُوخاتْ
تْفَيّقْنِي ، سِيدْ النْسُورْ
...
وَانَا عْلَى التّالْتَة ، نْعَوّلْ
وْ نْتَا ، شَدْ فْ عَزْ لْمَعْنَى
لا تْسَقْسِي ، لَا تْسوّلْ
دِيرْ عقْلَكْ فْ عَقْلِي
درْوِيشْ مْعَ درْوِيشْ
نْكتْبُو تَارِيخْ
انّقِّيوْ ... سْطُــــــــــــــورْ
...
نون حاء