Wafaa Oum Hamza Jlida

***

***نڭول كلمتي ***

بلا راس تولدت ساعتي
وماحدها تكبر
وتحفر دواخلي ساس 
كبرو ليها الريوس
ؤمن ساعة تولدو سوايع
ساعة تكبني ف ساعة
كثرو لوايع
وشاع هاذ الهم المنحوس
اللي هجج صغري
وهيج قهري
وباعني عبدة فسوق ليام
وخلى ضري يكبر
ويصير فبحوري عوام
الصبر. ..ولا الضبر
ولا احسن نهضر
ونلوح هاذ الدفلة من فمي
نرتاح
ؤنركب على شواري الزمان
ؤنتمختر
نقلب عل الرزمة
اللي خبيت فيها شي سويعات
نبرد بهم هاذ الكية
ونطفي نار الجمرات
الكايدة فيا
الشاربة مني ويدان
الكاسرة جناحي
والكادية من وكيدي عيدان
لقيتها سوايع بدالة
تضحك علي
وأنا اللي كنت عليها عوالة
تضوي ظلامي
وتفججني شمس ف نهاري
نسد بها لبيبان المفرعة
ونقفل التقابي المترعة
نديرها ف اكتافي
تهز علي حر العوافي
توقف شوكة
في حلق لفام لمشرعة
وهاهي خوات بيا
لقيتني كي ما صغري
كي ما كبري
مازال ف بلاصتي
طاوية رجليا
ف كفيفة لعمر
نتسنى ف ساعتي تحضر
وأنا نقلب فين نحفر
ؤفين ندفن هاذ القهر

وفاء أم حمزة