Nour Abouchama Hanif

*****

غْنايَا عزْ لعْنَايَة
...
بِينْ يِدِي دُخّانْ
ؤُ لْڭاشُوشْ ... بَرْقُوقَة
مْشَعْلَة صَهْدْ لْڭَـايْلَة
شَعّلْتْ زْنادْ الرّوحْ
كِي شَعّل " النّيرُو "
ڭلبْ الرّومْ
ؤُ بْزُوجْ ...
نْسِينَا رْمَادْنَا
فْ ڭلبْ الطّفّايَة
لْغُنّايَة ، دْواتْ
طَرْزَاتْ صْبَاعِي
سَوّاتْهَا حْكَايَة
سْطُورْ مَحْرُوڭَـة
حْرُوفْ مطْرُوحَة
وَاخْدَة منْ زِينكْ لَالّة
شَلّا دْفَا ...
شْكُونْ أنَا بْلا عيْنِي
وشْكُونْ يِنجّْ لِيَا
سلْهَامْ النّْهَارْ
يحُطُّو حْدَايَا
نْحسْ ڭلْبِي وَرْدَة حَمْرَا
ؤُ نْحسْ رُوحكْ
رِيحْ ؤُ رِيحَانْ
تْغَازلْ رْبِيعْ التْرَابْ
جْنَاحَاتْهَا ، لْرُوحِي مْرَايَة
سِيدْ لعْتَامْ ضَيْ لْفلْجَة
ؤُسِيدْ الدّْفَا حَمّامْ مْسَرِّي
رِيحْتُو ... مسْكْ مْوسّدْ النْدَى
غْوَا لْكسْدَة
غَطّاهَا عَنْبَرْ
سَوّاهَا ، دَوّاهَا
جْنَاحْ ، شْتَا سْخُونْ
ؤُ جْنَاحْ ، صِيفْ
هَرْبَاتُو فْ الطّينْ
لَالّة غْوَايَة
فِيكْ زِينْ اللّفّة
خَطْواتْ مِيزَانْ
ؤُ زِينْ لْوقْفَة ، نَخْلَة
حْمَامَة بَيْضَا
غَيمَة لَابْسَة فَرْدَة
لْمِيرْ جابْ التّانْيَة
حَطْهَا قْيَاسْ
لْڭلبْ ودّعْ لْبَاسْ
الدّخّانْ ولّى عْبُوقْ
طَيرْ مسْروقْ
الشّهْقَة رْذَاذْ
ؤُ لْبَاقِي ... حْشَاشَة
خزْناتْ الرّوحْ
فْ كْفُوفْ لعْنَايَة
...
نون . حاء