Yazid Alaoui Ismaili

*****

يا لَمْنَسَّم بالطِيبْ راه الطِّيب لأهل الطِيبة
و يا لْمَوْصوف بالعِيب راه العِيب سْبابو غِيبة
أنا قلبي لَّحبيب و القريب من ايَّام الصِبا
لأن لَحْبيب طْبيب و رْقيب فْ لِيَّام الصّْعِيبة
ما نتبع الذيب و لا رْهيب ما نقرب مْصِيبة
وْ راضي بالنصيب و ما نْغيب على لَحْبيبة

يَاك أنا مألوف و موصوف ما نْبدل سِيفَة
وْ ما نَاشِي ملهوف و متلوف و قانع بْرْغيفة
للخالق العطوف نهز كْفوف و النفس عْفيفة
ما نرضى بالخُوف و معروف بأعمال شْريفة
نْصرَّف لكلام صْروف ب لَحْروف نْشكّل توليفة
ما نبقى مكتوف ف ظروف صعبة و عْصيفة

راجل بين الرجال في لَفْعال كِيفْ الرجالة
نتحدى كل هْوال ف تّجوال بْحال الرحالة
يا من سوَّل و سال و السؤال يوَرَّث الْبَالة
رْزانة في لَقوال و مُحال تبيعني ف دْلالة
اللي جاني في البال يتقال ما نبدل حالة
ما يْهمّْني معلال و لا دلاَّل و لا كلام جهالة

ما نْتيق فْ الحلَّاف و الخُوَّاف يرجف رْجافة
يتمادى في لَوْصاف وْ لَخْرايف و يَدفع للحافة
هذاك اصلو مَلْهاف و نَفْناف وْ حْديثو قْرافة
ديما طايح لَكْتاف وْ حَتْراف راس العلافة
دايَر فيها مُوَظاف وْ عَراف يْدَخْلَك بْلْطافة
ما يَحْمَل قْفاف كِ الشاف و ما يَكْسَاب صْدافة

حاسَب راسو عايَق و فايَق يْخَدْعك بْلْباقة
يتظاهر انو صادق و حادق خْصايَل الْمَرَّاقة
يَتْرَك صاحبو غارق وْ يْفارق فْعايْل الشَّناقة
يسمح فيه عالق كِ السارق و يَحْسَبْها فْياقة
يبقى حاضي قارَق و دارَق مْخَبّي بْ دَرَّاقة
هذا انسان مارق ما يرافق ما يعرف صداقة

يزيد علوي اسماعيلي