Nour Abou Chama Hanif

*****

لْڭـَمْرَة ، مَاشْقَة سِيفْ خْضَرْ
...
نْشُوفْ لْڭـَمْرَة مَاشْقَة سِيفْ خْضَرْ
تشُقْ عْرُوقْ لْغَيْمَة
تْلُوحْ فْ سْوادْ لْخَلقْ ... نَظْرَة ...
تسْرَقْ منْ ڭـلبْهَا ... ڭَـطْرَة
وْ شْكُونْ فِيهُمْ ...
شْكُونْ فْ الرْجالْ ، يلْبَسْ لْمَـا
مَاهُو منْ بْلادْ لْعَجامْ
يغْرَسْ النّعْمَة شَجْرَة منْ يَاسْمِينْ
مَاهُو منْ شَامْ
ؤُ تْصَلِّي عْلَى قَبْلَة تْرَابْ
نبْتَة مْطَرْزَة بْ عْرَقْ لكْتَافْ
تتْوَضّا بْ لفْجَرْ
واللّي نْكَرْ السْمَا ، مَاتْ ...
نْشُوفْ لْڭـَمْرَة هَالَاتْ
رَاسْمَة تِيجانْ لْهَامَاتْ
اللّي شْرَبْ ظَلُّو فْ كِيسَانْ الضّوْ ،
عْقَدْ حْواجبْ الشّمسْ
بْلَا زَرّيعَة ...
دَلّاتُو لْنْوارْ فْ الذّلْ بْلا مْظَلْ
بْلَا وَرْدَة ، بْلا نْحَلْ
ملِّي فَرْقُو لْڭَـاعَة ،
بْلَا شَهْدَة ، بْلَا عْسلْ ...
...
طَاحتْ صْبَاعُو فْ اللّيلْ ...
سوّلْ عْلَى حَقّو فْ لوْدِيعَة ،
لْقَى حَقّو حَقّْ لْمُشْ ،
سْمَعْهَا ، مَا خَافْ مَا تْكمّشْ ...
قَشْرَاتُو لْولْدْ لْمَهْبُولَة
مَلّي شَافْ تْلَاتَة وْ تْلاتِينْ بَڭرَة فْ لْعَشّْ
ڭَـالْ : آرَا نْضْرُبْ الرّشْ
...
كَالتْ لْغَلّة ، ؤُ لْبَاقِي غْمارْ
اللّوْلَا ... هَازّة سْبُولَة
...
التّالْتَة ... وَرْدَة ملْتَاعَة
التّانْيَة ... دَارتْ فْ كفْهَا مِيزَانْ
هَادَا خُويَا ، هَاذَا عَمّي
هَادَا عْدُويَا ، هَادَا مَاشِي منْ دَمّي
لعْبَارْ فْضَحْ لْكَفّة ، كَانْ برْهانْ
...
شمّاتْ رِيحْ لْڭَـاعَة
لْخَامْسَة ... حْمَامَة بْلا جنْحِينْ
طَاحتْ منْ كَفّة
سَدّاتْ عْلى ڭلبْهَا دَفّة
...
هَرْسَاتْ عْصَا الطّاعَة
ظَنّاتْهَا ظْلَامْ ظْلِيمْ
الرّابْعَة ... شَافتْ الظّلْمَة
لْقَاتْ زِيتُو دُخّانْ ذْمِيمْ
شَعْلَاتْ فْ الدّوخَة فَانُوسْ
...
عَمّرْ لْعَودْ لْحُرْ
تْحِيضْ ؤُ تْبِيضْ ؤُ مَا تْفِيضْ
عَامْ يحْسَبْ عَامْ
ؤُ الذّمّة فْ تسْعُودْ ؤُ عشْرِينْ
...
لكْتَابْ ، شَرّڭْ وْرَاقْ لعْنَادْ
لِيمْنَة ... تْجِيبْ لهْنَا
زُوجْ دْفُوفْ ، بْلا زْنادْ
لقْرَايَة وَلّاتْ غْنَا
مَ الرّْحَامْنَة ، خْرَجْ تْراكْتُورْ
ؤُ لِيسْرَة تْسَاوِي وْ تْڭَـادْ
...
مَا يتْركَبْ بْلَا بَارُودْ
عشْنَا وْ شَفْنَا
لمَخْزنْ برّدْهَا بَارُودْ
اللّي سَخّنْهَا التْرَابْ
...
ورْقَة منْ كْتَابْ مدْهُونْ
عْرَيّشْ الزِّيتُونْ
حسْ الشّجْرَة غْراهْ
لْحْصَادْ غَلّة
سَرّو مَا بْقَى مدْفُونْ
...
لْحَرثْ شَلّا
مْواجُو هْوالْ
وْ الذّمّة ، فْ اللّي حرّكْ لْمُوتُورْ
...
الشّمْعَة رأجْعاتْ الظّلْمَة
شَافتْ لوْجَعْ طْوِيلْ ... وَاخدْ لْكَلْمَة
ڭَالتْ : نْضَوّي عسّاسْ علْ النّعْمَة
السْفِينَة شَافتْ لبْحَرْ ،
هِيَ تحْلَم ... ؤ لْعَيبْ مَاشِي فْ لْحلْمَة
...
ڭالتْ ، مَا ينْفَعْ فِيهْ بْكَا
ؤُ شِي ، قَارْصَاهْ نَحْلَة
مَا يرُدْ وْجَعْنَا ، مَوّالْ
لمْجاذَفْ قْصِيرَة
...
وْ لْحَلْمَة كْبَرْ منْ بَالْ
ؤُ لْبَاقِي شَافْتُو لْڭمْرَة
هَادِي حْضَاشْ منْ تْلَاتَة وْ تْلاتِينْ
ؤُ شِي عَاضْ فْ النّخْلَة
بِينْ بُرْجْ السْبَعْ ، ؤُ بُرْجْ الدّلْفِينْ
شِي شَادْ عَيْنُو
شِي يعْصُرْ أرْڭَـانْ
محْراثْ بلْدِي
هَادا رَاكبْ جْمَلْ
خْفَافُو دَوّاحَة
ؤُ هَادَا شَارِي فِيلْ
ؤُ جَارُو رَاكبْ تَفّاحَة
ؤُ للّي حْسَبْها شَمْسْ نَفّاحَة
اللّي ظَنْهَا مْظَلّْ
شْكُونْ يِحُطْ فُوقْ الدّارْ
لْڭَـمْرَة دَاختْ سَوْلَتْ لهْلَالْ
شَعّالَة
يسْقِي الصْباحْ بْغوتْ فَرّوجْ بلْدِي
ؤُ شْكُونْ يِرَعّفْ بزْبُوزْ لْما
يشُقْ التْرابْ
لا تبْكِي مَوّالْنَا
يِخَلّي لَالّة تفْرَحْ بْزِينْ لْخلّالَة
ترْكَبْ كُركْدأنْ
ما ترْكَبْ طُوبِيسْ
تقْنَعْ بْ الشّدّة لْحنِينَة
ما ترْكبْ طِيّارَة
تصْنَعْهَا إيدْ مْعَنْڭَـة إِيدْ
هَادِي قَصّة لْڭَـمْرَة
تْجِي لْڭَـمْرَة عِيدْ
تْجِي سْيُولْ هَدّارَة
نون حاء
...
تْغَنّي حالْنَا
ونْتَا يَا فْهِيمْ
لْغَا لكْلَامْ
حْسَبْ شْحالْ منْ صَوتْ عنْدكْ
ؤُ نْهَارْ الذّمّة ، لا دّيرْ بْحَالْنَا
...

شعيب