‎فاطنة جليدي الشاعرة‎, 

*****

راري ياراري ياركاد ادراري
ركد ليا بنتي فوق لفراش العالي
نحكي لك يابنتي احكاية
من ايام الصغر
كانت بنت زينة اسميرة
ماشطة اشعرها اظفيرة
اطويلة مجدولة نخيلة
حادكة نادكة ماشي اهبيلة
ابلاها الحب فواحد الليلة
صاحبت الكمرة حتى لفجر
وعست مع النجوم
وونست الشمعة اخذاتها اخليلة
ماكان جوال يجيب اخبار
ما كانت مدرسة تخرج من الدار
العاشق غارز فاعماقها لشفار
عاشت فخيالها ملقاه
فجنانات واحقول النوار
تغريد لطيار واحقول اسبول
...فات الخريف تبعو الربيع اخفيف
جا الصيف بخيرو لمطامر عمرو
وها زين العرسان من البعد يبان
جايب اهدايا ...الثمر حنا وريحان
وادهاز واذهب وشلا كتان
باسم الله فتحو لكتاب
اطلب يديها ادخل من الباب
الفرحة طلت والسعادة هللت
افرايج اجبالة اكناوة عيساوة
وأنغام ابلادي كلها احلاوة
رفعو الدعا والبركة بالخير مشفوعة
أباها فرحان احباب وجيران
زغرتو الزغراتات وامها من الفرحة ابكات
زينة لبنات لدارها امشات
اداتو واداها والله ما خلاها
أعطى كلمنتو ووفاها
وهذي قصة الجدات
اهنا سالات
امشات مع الواد الواد
وهذي قصة جدة وجداكووم يا اولاد لجواد