قصيدة من صنف الزجل المغربي
بعنوان:منسج الكلام
نسجت منسج من لحروف و غزلت صوفو
جمعت من لكلام الصحيح و هتوفو
جمعت من لكلام الصحيح و هتوفو
قرشلتو باصباعي و قلامي
خرجت ليا شلى معاني من قرشال تخمامي
خرجت ليا شلى معاني من قرشال تخمامي
دوزتها من بريم لمغزل
من بعد ما بقيت نستي نختار و نعزل و نفك تخبال الخيط لمخبل
من بعد ما بقيت نستي نختار و نعزل و نفك تخبال الخيط لمخبل
من الطعمة أحلى من آش و احر من آش
نزيد خيط فوق خيط بين سدى لحاضر لمعاش
نزيد خيط فوق خيط بين سدى لحاضر لمعاش
وقفت لمنسج و بين مناول لخشب
عقدت لعقدة بين لقصبة و لقصبة خيوط النيرة روح من لعجب
عقدت لعقدة بين لقصبة و لقصبة خيوط النيرة روح من لعجب
سميت الله و هزيت و ما نسيت
لخلالة و لمشط وبغيت
لخلالة و لمشط وبغيت
يكون حايك السرابة
واضح واخة وسط ضباب السحابة
واضح واخة وسط ضباب السحابة
غيزتها و طرحتها ديك لحروف
برگيم التبرگيم اللسان مسكوف
برگيم التبرگيم اللسان مسكوف
من تفراق اللغى لوذن تسغى
لعين تسقى بالشوق الملهوف الالوان الباهية تتحب و تبغى
لعين تسقى بالشوق الملهوف الالوان الباهية تتحب و تبغى
ديك زربية الاقوال الي شرحت الافعال من الافعال
و هاذي گليسة فيها تونيسة دراز لقلم گال و گال و شلى ما يتگال و باقي ما يتگال....
و هاذي گليسة فيها تونيسة دراز لقلم گال و گال و شلى ما يتگال و باقي ما يتگال....
بالصلاة والسلام ...على خير الانام ....مول لفلجة وزين لكلام ...كرجت منسجي
....لقنت الشهادة من بعد ماتسلت الروح من الروح ....وبانت زربيتي من نظمي ونسيجي
....لقنت الشهادة من بعد ماتسلت الروح من الروح ....وبانت زربيتي من نظمي ونسيجي
فاطنة محب...مجدوبة القلب الكبير....26/11/17....الدار البيضاء
ليست هناك تعليقات:
إرسال تعليق