Jamila Diet

***

بْغيتْ و بْغيتْ

بْغيتْ الحُب لِ كان يَوَلِّي
بْغيتْ الإحْساسْ الحْنينْ
لِيَّ يَرْجَعْ مْهَنِّي 
بْغيتْ تعْنيقَة لَعْماقْ تْدومْ
و ما يَكونْ فيهَا تَشْواقْ
ما تْغَيَرْ الحُب بالحِرمانْ
ما ْتغَيَّرْ الوَدْ بْ الدْمارْ
ما تْغَيَّرْ ْلمَّة بالعَزْلَة
ما تْغَيَّرْ مَرْجانْ راكْزْ
ساسُ فْ اعْماقْ بْحارُ
بْ مَرْجْ سايْل فْ سْواڭِي
ما عْرَفْ فِينْ يَلْقى احْبابو
ما تْغَيَّرْ حَبْ الرمَّان
لِ رَبِّي ذاكْرُ فْ القرآن
يَشْفي الذّاتْ منْ كُلْ
أذى و بُهْتانْ
بْ حبَّة حَدْجْ مُرَّة
تَسْحَقْ الكَبْدَة و المَصْران
هَذِي دَنْيا
اصْغارْتْ فْ عَيْنِيًَ
تْشوفْ غيرْالنَّهْب
ؤ قَلَّة النِّية
ما بْقاتْ ثِقَة
لا فيك ولا فِيَّ
هَذا زْمان البَلْيَة
خَلَّى شْبابْنا مَجْلِيَّة
ولا حَدْ يَقْرى سْلامُ عْلِيَّ
ونْڭُولو عْلاشْ ربِّي
خِيرُ هَزُّ عْلِيَّ
وَكْحاتْ الشَّجْرَة
عْروشْها عْلينَ بْكاتْ
عَطْشاتْ لَبْهيمَة
بْ صْياحْها
وَدْنينَ تْصَمْكاتْ
دُورُو دوْرَة الكَوْن
و نْشوفُو آشْ تَمْ
بْ لَعْقَلْ كُلْشِي يَتِمْ

جميلة بلهنبل/ المغرب