محمد الشافعي

***

نحْكي لْكمْ(زجل مغربي)

من سيرتي

كانتْ عنْدْنا نْوالَة
وكَانتْ ٱمِّي مْرَا عَوّالَة
لابْسَة تَحْتِيَة ودْفِينَة
وكانْ ٱبا عَزْري مَنْ ٱلرُّجَّالَة
يَخْدَمْ يَضْربْ تَمارَة
ديمَة مْهَلِّي فينا
وعَنْدْنَا مَ لَّمَّاعَنْ شَلَّا
كانتْ خابْيَة
وكانتْ ڨُلَّة
وُڨَصْعَة تَعْجَنْ فيها مِّي لَعْجِينَة
وكانْ مقْراجْ وحَوَّارْ
وبُرْمَة وفَخّارْ
وكانتْ مُغْرَفْ ومْعالَقْ كْبارْ
وغَسَّالْ نْغَسْلُو فيهْ يِدِينَا
وطْيَصْ
وصِينِيَة وبْرُوقْ
ورْبَيْعَة دَلْكيسانْ وصَنْدُوقْ
وقَلُّوشْ مَّلْحِينْ فيهْ سْمينَة
الصَّنْدوقْ قْليلْ فاش يَتْحَلْ
تانَبْغي نْحُلُّو
ونخافْ لَنَحْصَلْ
الْحاجَة لِيفِيهْ خْفاتْ عْلِينا
أمِّي مَلِّي تَبْغي تْعَمَّرْ أتَايْ
تشْعَلْ العافْيَة فَٱلْكانون
وتْردْ ٱلْغَلَّايْ
وتحُطْ ٱلصِّينيَة فيها لَبْروقْ
والْكيسانْ فيهمْ كاسْ
حازْمِينُو مَشْقُوقْ
تْعَمَّرْ وتْناوَلْ
وتْبَرَّدْ لِينَا
ونَعْقَلْ عْلى ٱلشَّكْوَى
بَتْوَاڨَدْهَا وفْلاكِيهَا
ومِّي مَلِّي تَبْغِي تمْخضْ تْحَاذِيها
وريحَتْ دْباغْها تَهْجيها
تمْخضْ وتْكُبْ وتَعْطينا
لْبَيْنَه حْلوَّا وبْنِينَة
أمِّي مسْكِينَه
فيها ٱلنّيَة وحْنِينَة
وكانتْ مَاتخْرجْشْ مَٱلْكشّينَة
ولَادْخَلْنا حْنَا ٱلْكشِّينَة
دُخَّانْها يبْغِي يعْمينَا
محمد الشافعي