نزهة صابر ام القمرين

***

شْحَالْ ڭَدْنِي نَصْبَرْ

زْرَدْتَكْ ڭَمْحْ
خْرَجْ دْقِيقَكْ شْعِيرْ
شْحَالْ ڭَدْنِي نَصْبَرْ
مْعاكْ آشْ نْدِيرْ
نْهارْ لَحْتكْ زَرّيعَة
كانتْ لْأَرْضْ
رَاوْيَة.....
تْرابْها مْڭَلّبْ
نْوِيتَكْ غَلّة
مَاشِي حْطَبْ
مَا سَخّنْ حَمَّامْ
مَا دَوّزْ سْبُولَة
مَنْ مَقْراجْ نْحاسْ
الي يطييح
يّْخَلِّيكْ تّْحَيَّرْ تَالَصّْباحْ
بْيَدُّو شَقّْ الرّاسْ
شْطَحْ فُوقْ
زَاجْ لِيامْ
مَا تَّجْرَحْ
مَا خَلَّى حَدّْ يَضّامْ
وَااشْ نْدِيرْ فِيكْ
سَرّحْتِينِي حْصِيَرة
فَ مْسِيدْ لْمَحْضْرَة
وَضّرْتِينِي تَلّفْتِينِي
والْكِيَّة قْوِيَّة
هَرْسَة خَايْبَة
وْ مَاا جَبَّرْتِينِي
يَاكْ أَنَا .....
أَنَا لِّي شْرِيتَكْ
ذْهَبْ حُـــرّْ
نْهارْ حْتَاجِيتُو
كْثَرْ نْحَاسُوا
مَا فَكّرْ فِـيّ
وَلَا فِي نَاسُوا
وَ تّا لِـيــــنْ
تَّالِـيــــــنْ
انْهَـــزّْ
انْـدَسّْ
نْخَبِّــي
نْــرَارِي
نَسْكُتْ
وانْتَ..، انْتَ
اِمْتَى تْحَسّْ
اِمْتَى تَفْهَمْ
اِمْتَى تَنْدَمْ
اِمْتَى تَحْكَمْ
بَالْحَقّْ ، مَاشِي الظُّلْمْ
اِمْتَى تَفْرَزْ
نَخّالَةْ طْحِينَكْ
اِمْتَى تَعْرَفْ بَلِّي
كِيفْ زْرَدْتَكْ
ڭَمْحْ
خْرَجْ دْڭِيڭَكْ
شْعِيـــرْ
يتبع
نزهة صابر ام القمرين