شعيب صالح المدكورى

***

شْحَالْ لَمَّحتْ
...
وااااا داك لَمْعَفَّرْ
رَانِي عْيِتْ ؤ تَخْنَقتْ
جْمَعتْ ؤُ جَمَّلتْ
بِ حْرُفِي عَبَّرتْ
گَرِّيتْ مَا خَفتْ
بِ غْرَامِي بَحتْ
مَنْ گَاعْ جُوفِي خَرَّجتْ
سرار حُبِّي ؤُ حَرتْ
اَشْ نْدِيرْ مَ عْرَفتْ
كُلْ طُرْقَانْ جَرَّبتْ
وااااا داك لَمْعَفَّرْ
گُولْ لِي وَاشْ حَاسْ يِيَا
ؤُ لَا غِيرِي سْبَابْ لْكِيَا
وَاشْ عَنْدَكْ تِيقَة فِيَا
خَبَّرْنِي يَا زِينْ سْمِيَا
حْرُوفَهَا مْعَانِى مَعْنِيَا
حَامْلَة جْمِيلَةْ لَهْدِيَا
بِينْ صَدَرْهَا مَحْمِيَا
هَا لْعَارْ لَا تْعَفرْ عْلِيَا
رْحَمْ ضَعْفِي شْوِيَا
وااااا داك لَمْعَفَّرْ
حْيِنِي وَلَا قْتُلْنِي
فِ عْدَابِي لَا تْخَلِّنِي
فِ گَلْبَكْ حْضَنِّي
فِ رْگَادِي مَحَنْتِنِي
بِ عَينْ رَحْمَة شُوفِنِي
نْشِيلَكْ ؤُ تْشِلِينِي
نْكُونْ لِكْ وُ تْكُونِي
رُوحِي لَا تْفَارْقِنِي
كْونِي جَنْبِي لَ اتَهْجَرْنِي
وااااا داك لَمْعَفَّرْ
وَقْتَلشْ يَتَطْلْفْ سْرَاحْ
نَتْهَنَا ؤُ نَرْتَاحْ
ؤُ نْكَمَّدْ لَجْرَاحْ
نَرْسَلْ طِيرْ بَرَّاحْ
يَشِيعْ خْبَارْ لَفْرَاحْ
بِ جَمعْ شْمَلْ لَرْوَاحْ
فِ حْظُورْ لَمْلَاحْ
مْوَلِينْ لْخَيلْ وَ سْلَاحْ
مُوسَمْ بِ نْهَارْ وَضَّاحْ

شعيب صالح المدكوري
تامسنا 28.11.2017