محمد الشافعي

***

-مايْدومْ حال-(زجل مغربي)

لَحْمَلْ ثْقيلْ وَٱلظْهَرْ قْصِيرْ
ليامْ بْقَسْوَتْها عمْلَتْ ما بْغاتْ
غابْ قٌرْصْ ٱلشّمسْ ٱلضّاوي
النَّفْسْ بَٱلْهَمْ تْوَضَّاتْ
زينْ الدّنْيَا ٱلْگَادِي
كْشَفْ وشَوْفْ ٱلْعَيْنْ بْهَاتْ
حْلامي كانت حَلمَة سارْحَة
وسَايْحَة بْروحْ الذّاتْ
طْريقْها بيْنْ فَفْيَافي وجْبالْ عالْيَة
تْسرّْحَتْ وتْسَوّاتْ
الذّاتْ واهْنَة
عْلى فْراشْ اللّحْظَة ٱلْحاظْرَة
عْليلَة وبجْراحْ دْمَاتْ
فطْريقْ طْويلَة وشايْكَة
لقْدامْ تْحَفَّاتْ
رَحْمَةْ ربي خيرْ عٱللَّعْبادْ دَافْگَة
ورَزْقْ ٱلجُّوفْ فيهْ يباتْ
هَذِي لَحْظَة وْعَابْرَا
قْصيرَة وطَرْفْ مَ ٱللِّي فَاتْ
الدّنْيا نَشْبَة وشَاطْنَة
بْهَمْهَا سَلْبَتْ ودْهَاتْ
ذيكْ ٱلنَّجْمَة ٱلْعالْيَة
بْنُورْها فٱلليلْ ضْوَاتْ
ذيكْ ٱلدّمْعَة السّايْلَة
وبِها لَخْدودْ رْوَاتْ
فَضْحَتْ ٱلْعَيْن ٱلْباكْيَة
بِها وبَٱلسَّرْ فْشَاتْ
بْكَايَا في گَلْبي ولَمُّو
مَافَضْحَاتُو نَبْضاتْ
سَرِّي في صَدْرِي رَادْمُو
شْوارْبِي عْلى فُمِّي دَفَّاتْ
الصَّمْتْ في طَبْعِي مَّالْفُو
عادَة مَنْ ٱلصُّغْرْ تْرَبّاتْ
اللِّي يرُوقْنِي لْغَاهْ وَبْهَاهْ
هْجَرْني ومانَنْساهْ
قْريحْتي عْليهْ دْواتْ
نارْ ٱلْوَحْدَة كْواتْنِي
وبَشْهَادَةْ ٱلصْبَرْ وَٱلسْكَاتْ
محمد الشافعي25/11/2017