هزيت مغيزل حروفي

Fatna Mouhib

*****

هزيت مغيزل حروفي
قلت نقدر تشوف تشوفي
نبرم شي طعمة
بيه زريبية قصيتي تكون مرگومة
ؤ شي سدى خفيف 
نوقف بيه منسج لحايك لخفيف
سدى في سدى
شي جلابة واقفة آ سيدي منخوية مجبدة
قلبت في سلة صوف المعاني
على ليگة مصبوغة صباغة الرحماني
تنسدي بها منسج لحادگات
لالياتي الزمانيات الي من صباعهم يخرجو لحرير ذوك شاگات
شون الزمان مزوقين عناقهم باللبان
الحناني كحلة مرگومة من البعيد تبان
ولباسهم قفطان مخزني و حزامو سلطان
رابط لهمة و ساتر بلحشمة و تما سر و ملح كان
لهضرة و النظرة و الصواب سواك اللسان
لخدود وردية و الشفايف عكرية
لكحل و لحرگوس و النفگة عطرية
فايحة بالخزامة و لقرنفل و الورود البلدية
جبدت يديا من سليلة لمعاني ريحة جدودي فاحت هايجة تنوني
فرح خاطري و تبهج لوني
تسرسبو الحروف في شوني
قالو لي حنا قصيتك المسرسبة خودي الي حبيتي و كوني كيف بغيتي تكوني

.....فاطنة محب....الدار البيضاء