جيتيني بثلث اوجوه
--- 0 - 0 ---
جيتيني بثلث اوجوه
يا هاذ السلاطة
الوجه لول وجه النفاق
اضحكتي في وجهي
واليد مادا ليا لحلاوة
احسبتك ناوية اتفكيني
من هاذ الجهالة
تقت فك ثقة عمية
اعطيتك نيتي
ومنحتك صوتي
غا انجحتي وغبرتي
اتسنيتك اترجعي
اتسنيتك اتجيني
في المحنة
داوي علتي وهبالي
اتفكي اخبالي
اغبرتي ما بنتي
والوجه الثاني
وليتي دوزي بيه من احدايا
هازة انيوفك للسما
عاطية بالصدة
امنوضة لعجاج
وعامية عينيا بالتراب
ومخياني مع لعقاب
ونا اللي اتمنيتك اتركبيني
على ظهرك
اتراري بيا
كي الدري الصغير
انحس بالحنان
و يرتاح البال
و تكوني وقت امحايني
واقفة في جنبي
دافعي على حقي
بك نتعنى
والوجه الثالث
عامر بالبلا
داير خبلة
كرش ابلا اضلوع
تحصدي بمناجلك من رزقي
ودرسي بصفايح رجليك
فوق ظهري
تا ايسيل دمي
وتجمعي غلتي
وتعطيني الثلث من الخموس
ؤتمشي ما اتلفتي
ؤ مزال طامعة اترجعي
ضحكي في وجهي
ضحكة مطلية بلوان
امتلفة قومان
وتقدي حاجتك
في قلة عرفي
وتبايعي وتشاراي
امعا اوجوه اخرين
افحال اوجوهك
على اللي باقي
في جرتي
بقلمي
المصطفى لخضر
مساء يوم الثلاثاء 13 مارس 2018
ليست هناك تعليقات:
إرسال تعليق