وانا قدام البحر

عزالدين الشدادي

*****

وانا قدام البحر اعترفت بأني لغز ، وكتبت الإعتراف نص :

أناَ ،
نقطة فِ بحر
الشمس م كَ تشوفنيش
م كَ نتشافش بالعين المجردة
كَ يقولو علي ،
لغز الله
ك يعطُوني تعْريفات كَ تفوق المِائة
وأنا ،
حاَلف تَنبقى علامة إستفهام ؟

كَ يقولو أنا ولد الطبيعة
وأنا كَ نقول شكون وْلد الطبيعة ؟

كَ نجزم بأن الطبيعة مخلوق
إيَّهْ ،
وحتى هيَّ بحالي مْعرضة الفناء

شكُون أنا أوْ أنا شكُون ؟

سؤال خاصو ( Dictionnaire )
خاصو معجم الوجود
وقبل ،
خاصو منطق كَ يتجاوز حدود القلب و العقل

كَ يقولو بلِّي أنا كحل الرَّاسْ
بنادم ولد آدم
مقذوف بيَّ هنا
محكوم بحتمية أزلية

من راسي لرجليَّ مصنوع
السؤال :
شكون صنعني ؟

بين حفريات إثيوبيا وايغود
عندي آلاف السنين
السؤال :
واشْ أنا واحَد فِ كل هذ السنين ؟

الطبيعة م كَ تولدشْ
ملاَك الموت م كَ يحيِيشْ
الجنة م كَ تشافشْ
البحر مَ محْدودشْ

أنا إذن سؤال ،

طيِن بلا ما (ء )
سحاب بلا سما (ء )
نجوم كَ تساقط وقبل مَ كتوصل الأرض
كَ تختفي بين أفق الليل والنهار

ساهلة تقول أناَ صدفة
صعيبة تقول : شْنا هي الصدفة ؟
واش جات من العدم ؟
واش الصدفة كَ تحْيِي ؟

ساهلة تنكر
صعيبة تعترف
بأنك لغز !

نقطة ،
فِ بحر مَ كتشافش بالعين المجردة

- عزالدين الشدادي -