فاطمة المسعودي

*****

اظْلَامْ الْحَالْ
---------------
اظْلام الْحَالْ
وْ الَعَيْن كْساتْها اجْلالة
تْعَرّات لَفْعَالْ
و بَانَتْ لَعْيُوب
اللي سَدّينَا عْلِيها بَ اقْفَالَة
--
مَا نْحَنّو عْلََى يْتِيم
مَا نْرَدّو فْ مسْكِين الْبَالْ
مَا نْرَحْمُو هَجّالة
--
تْغَيّر الْحَالْ
و خْيَابَتْ الْحَالَة
--
يَاكْ زْرَعْنا غلّتْنَا فَ تْرَابْ
شْرِيفْ مَسْقي بْ دَمْ الرْجَالْ
وْرَثْ الْعَزْ سْلالَة
--
نْبَت وَ خْضَار
وْ بْرَجْلُو مْشَى هَرْوَالْ
لْ رَحْبَة النْذَالَة
شِي تّبْلَى بَ لحْشيشْ
شِي تّبْلَى بَ الْكَالا
--
حَسْنُو حْسَانَة غْرِيبَة
نَقْصُو شْبَرْ منْ السَّرْوالْ
لَبْسُو الزْوَاهَكْ
وْ زَادُوا الْخُلالَة
--
طَارْ الحْيَا وْ طَارَتْ الْحَشْمَة
طَاحَتْ الْكَلْمَة
وْ كَثْرَت الَبْسَالَة
--
حْرَارْ لَكْلَامْ فْحَلْقِي
مَا قْدَرْت نَوْصَفْ هَذْ الْحَالَة
--
يَا وَلْدِي ضَرْنِي الْحَالْ
بْغَيْتَك تْفيقْ مَنْ هَذْ لَهْبالْ
مَا بْغَيْت يَضْحَكْ فِيكْ مَن وَالَى
--
انْتُومَا رْكيزَتْ لَبْلادْ
انْتُمَا الرْجَالْ
انْتُومَا الْخَيّالا
--
هَزّوا لَمْكَاحَلْ
خَرْجُو الْعَلْفَة
وْ دٍيرُو الْفَالْ
جِيبُو الْعَزْ
كِيفَ جابُوهْ الْوَالا
--
يَا وَلْدِي شْنُو شَطْنَكْ
شْنو هَوّسْ الْبَالْ
حَتّى وْلّاتْ نَارْ الْبَلْيَة
فْ صَدْرَكْ شَعّالَة؟؟
--
مَا قْدَرْتْ نَسْكَت وَ نْخَلّيكْ
وْ بْعَيْنِي شَفَتْهُم غَمْضُو عَيْنِيكْ
نَصْبُو قَدّامَكْ لَخْبَالْ
وْ كَالُو لَكْ تْعَالَى
--
طَحْتِي
بْقَيْتِي لا صَحّة لا مَالْ
هَا السّرَطَانْ وَ السّلْ
وَ الجّهْد قْلالْ
عْلاش تخْتَارْ
هَذْ اسْمُومْ الْقَتّالَة؟؟
--
فَسْدَتْ لَخْلَاقْ
وَ الأصْل الزّينْ ذْلالْ
الْعَيْب فَ اللْسَانْ اسْهَالْ
وَ لَكْلامْ اصْبَح سْفَالَة
--
تْغًير الْحَالْ
وَ خْيابَتْ الْحَالَة
--
يَا وَلْدِي عَيْشُوكْ فَ الْوََهْم
كَتْفُوكْ بْلا احْبَالْ
سْرَحْتِي فَ لَخْيَالْ
امْتَى تْفِيقْ يَا وَلْدِي
وْ هَذْ الْهَمْ يَتْسَالَى؟؟
--
امْتَى تَفْسَخْ شْرِيطْ الذّلْ
وْ تَلْبَسْ الْعَزْ حْمَالَة؟
امْتَى نْشُوفْ
الصْغِيرْ فً أوْلادْ بْلادِي
يَتّحْسَبْ مْعَ الرّجالَة؟؟
--
حْرَارْ لَكْلَامْ فْ حَلْقِي
مَا قْدَرتْ نَوْصَفْ هَذْ الْحَالَة
--
وْ انَا نْشُوفَكْ يَاوَلْدِي
تْبِيعْ صَحْتًكْ بْلا مَالْ
و عُمْرَكْ يَتْقًاضَى
بْلا مِيجَالْ
بارَاكَا عْلِيكْ مًنْ هَدْ الْبَلا
--
فِينْكُمْ يَا هَلْ لَكْلامْ
فِينْكُمْ يَا الزَجّالَة
شْرْجُو حْرُوفْكُمْ
كُولُو الّلي خَصّو يَتْكَالْ
وَ صْلُو الرّسَالَة
وَ صْلُو الرّسَالَة
--------------------------------
فاطمة المسعودي / سلا