Nour Abouchama Hanif

******

بَااااعْ
...
هِيَ رَاشْقَانِي نَبْلَة
ؤُ رَاحْتِي تَارِيخْ
نْشُوفْ لمْدِينَة قَبْلَة
ؤُ جِيرَانْهَا مَرِّيخْ
...
هِيَ ضَارْبَانِي نَاقُوسْ
لْقُدسْ عَزْ لقْدَاسَة
نجْمَاتْ هِيَ ، هُومَا قَادُوسْ
لفْرَاشْ كانْ حْلَاسَة
...
الرّْمَلْ ولّى بِيرْ
48 بَاعتْ لْغَفْلَة
لْكاتْ كاتْ غَطّاتْ لْعِيرْ
التّارِيخْ كتْبَاتُو دَفْلَة
...
لْيُومْ لْحُڭـرَة دَارتْ ڭْـرُونْ
سَمّاتْ لْوَرْدَة شُوكَة
خُّوتْنا نْعَامَة بْ ظْهَرْ فَكْرُونْ
رْوَاحْ مْعَشّة فِيهَا مُوكَة
...
شْكُونْ بَاعْ
ؤُ شْكُونْ ڭَـالْ " بَاعْ "
عْلِيّا أَنَا دْرَاعْ
ؤُ عْلِيهُمْ ... مَا نسْمَعْ غِيرْ
" مَااااعْ "
...
نون حاء