عبدالله التويس أبوفيروز

******

غير........ داوي
--------------------
ياكْ
فاش تْلَيْلَتْ لمڭانة
تْيَدمَتْ لڭلسة
وشعلت فينا لڭانة
ؤ مَكانْ غير انت وانا
افتح لقاموس
بواب ازمان
اتأوّلْنا حرارة
حلاوة ومْرارة
وكانت ف الناموس
اقدَر
ؤ ف لكتاب يْمارة
انا وانْت
فراش من تراب
انا وانت
فرحة من عذاب
انا وانت موج
مْسَتّفْ حياة
مْحوّطنا بحر
اهدية ل اسما
ولْما
من ارحام اسحابة
يغسل نجمتي
ف مراية عينيك
تَتْعرّا لْعلّة
لقشرة تلعب مع الريح
والرّيحان اعجينْ
من خطوط يْدْيك
وهاد الدم اعياط
وهاد لڭلب اجريح
كمشة
من الحب
تغدّي سبولنا
ؤ لحصاد غلّة
ساروت
ل هاد لوجود
والكون ملة
بدايتو حب بلا نهاية
ونْهايتو حب بلا بداية
ولغاية
ازمان ف مكانو
وبابو بلا قفل
خليك ديما عْروس
لمكتوب راه
زمّمْ احروف ل ادوانا
ؤ من الليف
اتّزرَع اغذانا
وانت ولادّة ل احروف
ابداية ف لڭلب مغروس
كتاب وحكاية وتأْليف
لْهاد لعمر
لَمْفسّرحلمة ف عينيك
ؤ ف اللوح معروف
يالّاه
نسلخو انهار من ليلو
ونْعَتلو اداونا
اطعام لجْراح
تكون لقصيدة دالية
منك نعصر ل افراح
ونسقيك مداد
تلبسك حروف لْمتَاني
يشرب لما من لْما
ويفيق لفجر
يلقانا افجر قدامو
ؤ مَنّا وفينا ولينا
تفرح الارض
عاوْد تاني..

البوهالي : 2018.01.01