بقلم الاستادة الشاعرة وفاء ام حمزة

***يبست لفراح **

يبست فينا  لفراح
تلجمت
 تحطت على فمها كمامة
صباغة بلا لوان
رسمت وجها فمنامة
تغسلت وتكفنت
 بيد لقراح تدفنت
  لي تسيدت فقيه
ولبست ل عمامة
 ف شلى وجوه تشكلت
وجه مايشبه وجه
تفتي
تحلل وتحرم
تقتل وتحيي
ياربي السلامة
  علات مقامها بلا شوار
ب طول ب لعرض
تتسارى ف كل مدينة ودوار
تتبورد كيف بغات
نوضت الريش
وهي اللي كانت
 ف مطورة راكدة
تعد ف ليام ومنا رافدة
شكون طل عليك
مد يديه ليديك
طلق ليك لسراح
خرجتي بعوافيك
هايجة و تسوطي
طالقة يديك طراح
لبستينا ل هم
كسيتيه من لعذاب جديدو
ولبالي راح
فيقتي ضرنا
يطلق لسانو براح
نوضتي ل عجاج فينا نطاح
زرعتي منا فدادن جراح
حصدتي
درستي ودريتي
جمعتي من كاعتنا
غلة لفراح
خليتي جرحنا نواح
عطبتي قلوبنا
ف شجرة علقتيها
تديها وتجيبها ل رياح
كفي
باركة من تفطاح
درتي منك مسيد
تعلمي ل كتابة ول قراية
عمرتي من همومنا  اللواح
دونتي كتاب بلا عنوان
سطورو باهتة
ألفتي حكاية
شخصياتها واهية
بنيتي مدينة بلا سكان
حيوطها قصيرة مهاوية
بلاك ضركة عامرة شوك
جدمتينا
حالنا أصبح مريض مهلوك
جرجفتي دمنا
 جريتينا وراك
كي لعبد المملوك
جبحك قطران
نحلو خوى ل وطان
 خفي ....عفي
باركة قهر وامحان
سرطي سمك
وخليني نشرب
 من كاس غيابك دوايا
نخطي خطوات لقدام
ونرميك ورايا
 نحفر حفرة ونردم عليك
ونشكيك لربي
هو يكد بيك
والريح لي جابك يديك

وفاء أم حمزة ج