Said Lachhab

********

" حرف جديد"

رابح و مربوح

رابح ....سول...مربوح
واش مزال فيه الروح
جاوبو بصوت مبحوح
راني صابر وخا مدبوح
قوتي طيوح الطيوح
ودوايا "فيتور" مليوح

رابح دار حسابو ما جابو خبارو حضاية
مربوح جابتو الوقت ونقز طاح حدايا

مربوح و رابح
جوج فردات مخاويات
خلاو لكلاب تتنابح
ومڭابلين جوج مرايات
ونساو الهم ف الجبح سارح
طاح الضيم وجفلو النحلات

رابح بان ف لمراية طويل وعريض
مربوح عيات توڭضو لمرايا وبان مريض

ف المحرك ما تبان عداوة
رابح فوق عودو زين الركبة
ومربوح يرقع سلهام الخاوة
يزير ف لجام الڭصبة
بلا بارود بلا جناوة
كملو الضربة وشربو كيسان لمحبة

رابح معلف عودو شعير وكبال
ومربوح على "نفخة" ڭصبتو عوال

سولت مربوح واش قرا اللوح
سولتو علاش رابح ديما رابح
سولتو علاش هو ديما مصلوخ
وعلاش عشاتو من "دواز" البارح
وعلاش مربوح طلع لسفينة نوح
وعلاش وحدو ف الحزة يكافح

رابح يمكن راجل كريم
مربوح صابر ف الحزة والضيم

وأنا يمكن اللي غشيم.

لشهب سعيد
30 يناير 2018