Med Mehdaoui

******

…...لق لق يا لقلاق…...

لق لق يا لقلاق
تبرع
ب حريتك
راك طير مرزاق
لق لق يا لقلاق
يا اللي ساكن ف لعلالي
مرتاح البال
راك انت طير ذواق
بعيد على الدخاخن
والصداع
ختاريت تهرب
من النفاق
لق لق يا لقلاق
انت ف السما
هايم
ع لكلام صايم
انت معذبني
مقادر نتخلى عليك
مقادر ع لفراق
لق لق يا لقلاق
بغيتك تهود عندي
نعنقك
ونسولك
ع اللي جرالك
نزل
تعرف ما بيا
من اشواق
نزل
راني عارفك
متواضع
لبسك بيض وكحل
مفيه زواق
هود نحكيلك
مابيا
من حماق
نزل فاجي عليا
هزني فوق جنيحاتك
نسافر معك
بعيد..
وخ للوقواق
راه بنادم ضاع
وسط لكذوب
والحگرة
مبقات لا شهامة
لا أخلاق
لق لق يا لقلاق
راه صوتك لحنين
يونسني فالليالي
يفكرني ب شبابي
ملي كنت
سيد العشاق

محمد مهداوي