Choaib El Harougui

***

🍁 قصيدة زجلية :" الزِّينْ الْبَاهِي..!"🍁

حْلاوَةْ لَكْلاَمْ فَ لْسَانُو
وْزينُو غَطَّى عْلَى زِينْ الْغِيْر..
زِينُو لْبَاهي فْ حُسْنْ كْلاَمُو
وْنَظْمْ تَفْكِيرُو لَغْزيرْ..
مَتْوَاضَعْ وْلَعْقَلْ عَنُدو زَاهي
وَلْقَلْبْ الصَّافِي جْنَانْ الْخِيرْ..
سْماهْ مَا فِيها غْمَامَةْ
وَلْحُبّْ عَنْدو مَاهُو حْريرْ..
مَاهُو ثُوبْ ولا عْمَامَةْ،
صَدْقْ فْعَالْ وْحُلْمْ كْبِيرْ..!
----////----
يَالْورْدَةْ نَحْميكْ بَجْفُونِي
وَنْعيشْ مْعَاكْ طَفْلْ صْغِيرْ..
سْقيني مَنْ حَوْضْ جْنُونَكْ
جْنونْ الْحُبّْ حْلاَلْ كْثيرْ..
سْقيني وْلاَ تْخٍَبِّي هْواكْ
أنتِ رُوحي وَهْواكْ عْشِيرْ..
بْ قَلبْ صافِي اخْتارْتْ هْواكْ
وَلْقَلْبْ سَلْطانْ لِيكْ يْصِيرْ..
رْعَايَـهْ بْ حُبّْ وَلْـــطافـَــةْ
لْحُبّْ سْلالَةْ يْجي بَ لْخِيرْ..
يْصَفِّي النّْفُوسْ مَنْ كُل ضْغِينَةْ
يْبَيَّضْ لَقْلُوبْ بْحَالْ الجِّيرْ..
خَلِّيهْ بْيَضْ زِينُو فَ بْيَاضُو
لَبْيَضْ شْريفْ الزّْوَاقْ يْطِيرْ..
لْحُبّْ جْمِيلْ لَكَانْ صَادَقْ،،
لاَتلَْغيهْ.. لَعْمَرْ قْصِيرْ..
----////----
الزِّينْ إِلَى زِينْ لَفْعَالْ،،
اخْتَارْ الآصَلْ لِيهْ تْوَلِّي..
لاَتَفْتَنْ بَ الزِّينْ وَحْدُو
الزِّينْ عْطِيَّةْ بِيهْ تْحَلِّي..
الزِّينْ وَاﻵصَلْ إلَى تْجَمْعُوا
شْكُرْ الْخَالَقْ حِينْ تْصَلِّي..
الْآصَلْ لِّي دَايَمْ فِيناَ
الزِّينْ يَذْبَالْ وَلْمَالْ يَْمشِي..
عِيشْ عِيشَةْ عْلَى قَدْ لْحَالْ
لِّي يْذُوبْ فِينَا مَايَغْرِي..
كُلْ مَايْذِوبْ فِينَا فَانِي
وَالْآصَلْ طُولْ زْمَانُو يْسْرِي..
----////----
فَتْنَةْ الْعَينْْْ سْحَابَةْ،،
فَتْنَْة لْقَلْبْ شْحَالْ تَعْمِي..
لَعْقل إلَى غَابْ فَ وْقَاتُو
الرُّوحْ لَحْنينَةْ عْليهْ تَبْكي..
حْلاوَةْ رُوحَكْ تْداوِينِي
الطَّبْعْ المصْوابْ فيك يَغْرِي..
الزِّينْ والآصَلْ بْغيتُو
حَبِّيتُو كِيفْ.. ؟! مَانَدْرِي..!!

**** 🍂بقلم : ذ شعيب الحروكي🍂****