عمر بنحيدي

***

طفل فوق وطفل تحت:

واحد الليلة

قمت بحولة

بقى عقلي سرحان

مابين طفل

عايش ف الحرمان

وطفل وصل البرلمان.

واحد يقول انا هو انا

مكاين بحالي عندي الحصانة .

والاخر يقول انا هو انا

مكاين بحالي ف المحنة.

سيرور ف الصيف والشتا

جيعان نعس فينما بلاغطا.

السيرور سول البرلماني

كيفاش حتى وليت ممثل؟

- هذي قبتي

ورتها على بويا وجدي

فيها حنى انا نتبت وجودي.

وارتها؟بلا حملة بلا انتخاب ؟

هادشي خاص بالشياب

اما حنا ما علينا بواب.

كتخلصو وعندكم تقاعد؟

ايه والديبلاصما والحوافز

حينت كنتمحنو باش نمتلو

وناقشو ونلعبو ونتعطلو

باش اللي بحالك يقولو

مساكن كيسهرو ف العلو

وحنا سطاج ..مني نكبرو

نكونو تعلمنا كيف نعبرو.

وانت اشنو ورتي على بوك؟

بويا ولدني ورماني

والصندوقة اعطاني

نسيري صبابط قراني

وانا عربان وحفيان.

وانتوما اللي ف البرلمان

ناقشتوحالة الحرمان

ومعاناة اطفال الميكا والجوان

ف الشوارع وف كل مكان؟

هادي امور خاصة بالكبار

حانا غير كنلعبو باقين صغار.

عمركم لعبتو الصوطا مولات المال؟

اش من صوطا ؟احنا هما ماليه

الملحة والسر عليه.

عمر بنحيدي
4/12/2017