Nour Abouchama Hanif

***

تُوبَة
...
رَبِّي نْتَا لْعَالِي
وَانَا خَفْقَة مَحْدُورَة
فْ التْرَابْ نَاشْفَة
بْغِيتْ نْلمْ شْظَايَا
فْ ثُوبْ رُوحِي
لْقِيتْ جْنَابِي خَايْفَة
...
غَدّا نْشُوفْ اهْوَالْ
تْمُورْ سْطُورْ
فْ كْتَابِي لْعَرْيَانْ
الدَّار دَارِينْ
دَارْ فتْنَة ، والثّانْيَة
حْسَابْ النّفسْ لْوَاجْفَة
...
أَنَا نْدُورْ دَمْعَة
و نْدُورْ شَمْعَة
ؤُ لحْسَابْ بِينْهُمْ لَمْعَـة
لْحَسَنَة ، اسْبُولَاتْ عَامْرَة
ؤُ لخْسَارَة حَسْرَاتْ نَازْفَة
...
دَمّي فْ لْبَاطلْ
دَفْقَاتْ سْخُونَاتْ
ؤُ فْ لْخَيرْ دفْقَة يِتِيمَة
لْكَسْدَة عَودْ مَلّاَطِي امْدَرْدَكْ
ؤُ رُوحِي فَرْخَة رَاجْفَـة
...
لِّي بْنِيتُو ظَنّيتُو دَارِي
ؤُ مَ عَلّقْتُو بْ السّْمَا
حايطْ هَارِي
اوْهَنْ منْ بِيتْ لْخَيطْ
جَابْتُو الرّيحْ قَشَّة ،
دَكَّاتُو عَاصْفَة
...
الدّنْيَا عْڭاربْ
حَاشْدَة سَمْهَا تْحَاربْ
صْدُورْنَا امْقَاصـدْ
ڭلُوبْنَا سَاحَاتْ
سَايْبَة فِيهَا طَعْنَاتْ
منْ زاحفْ ؤُ زَاحْفَـة
...
ڭلْبِي رَابضْ
فْ لْحَرْكَة بْلا مْخَالبْ
ؤُ لْمُوتْ عَسّــاسْ
مَ تنْفَعْنِي هَجْمة
وَ لَا رَجْمَة
ؤُ تسْعَفْنِي هَجْعَة وَاقْفَة
...
ربِّي ، هَادِي كَفِّي
ؤُ هَادِي امْزُوقْ رُوحِي
ف لــهْوَى
اقْبَلْ تُوبَة منْ مسْكِينْ
ڭلْبُو عَاجزْ
ؤُ الدّمْعَة وَاكْفَـة
...
نون حاء