صوف لمعاني كواني
جيتكم رافد قلامي
نشكي حالي
ف سطور من كلامي
نشكي حالي
ف سطور من كلامي
هادي ورقتي ليكم هازة
من سلامي علام
من سلامي علام
راسي عريان حافي لقدام
طافي عوافي المحنة
والخاطر ممحي بصنصال
والخاطر ممحي بصنصال
برك يا صاح
فرش الكعدة
تفهم جلايل لمعنى
فرش الكعدة
تفهم جلايل لمعنى
هاك من حالي قصيدة
ؤ هاك من قطرات إمدادي
اوكيدة
اوكيدة
ؤ هاك من عسل الجوف
تغميسة
امكسلة ف غدير المحنة
شكاية من الهم متقال
تغميسة
امكسلة ف غدير المحنة
شكاية من الهم متقال
خليك من تشويطة
و الدوقة
بلسان لحموضة
و الدوقة
بلسان لحموضة
خليك من لقوافي الملغومة
ؤ هاك من ساس لعطية
امحبة ما تعرف تهراس
امحبة ما تعرف تهراس
خود من حروف حليبي
خليه ايروب
نخظو اللبن يخرج زبدة
تكسبو ايدام
خليه ايروب
نخظو اللبن يخرج زبدة
تكسبو ايدام
برك يا صاح
ؤ شوف علا كد النظر
تفهم عثبة البصر
ؤ شوف علا كد النظر
تفهم عثبة البصر
تلبسني سلهام
ؤ خوذ من حكام الجذابة
ؤ خوذ من حكام الجذابة
ولبسني جلابة
نستر فيك الكسدة و لكمام
نستر فيك الكسدة و لكمام
أجبدني من كاع البير
لاتخلي سكاتي فيا ايحيل
لاتخلي سكاتي فيا ايحيل
شربني جغمة من ما صافي
تبرى فيك حركة الزمان
تبرى فيك حركة الزمان
نطفئ فيك عوافي الجوف
لا تبقى عطشان
لا تبقى عطشان
لا تخليني سارح ف غفلة
من فهامتي
وكلام يديه الريح وانت ساد لودان
من فهامتي
وكلام يديه الريح وانت ساد لودان
لا تضحك ف غيبتي
ؤ تغشم الغافل رآه حماقي الا دوى
ايطيح من الدمعة شلا كلام
ؤ تغشم الغافل رآه حماقي الا دوى
ايطيح من الدمعة شلا كلام
منحوث فيا الهم
والقلب معدود من الصخر
ولي طل عليه ايعود ارجوعو من المحال
والقلب معدود من الصخر
ولي طل عليه ايعود ارجوعو من المحال
هدا انا ... طالي وجهي بالسكات
داوي ف الدواية امبكي لقلم
داير للحروف اللجام
داوي ف الدواية امبكي لقلم
داير للحروف اللجام
هاز سناحي نتبورد ف مجبد لكلام
بقلم : محمد زرواني
ليست هناك تعليقات:
إرسال تعليق