‎الإدريسي رحال‎
***

نده يا علام ...
مسح ريوگ لبهاليل
الجدبة الجدبة
عجاجة الحرف و لقلام
شرگات گاشوش العطبة
ما بقى عز ولا تاويل
آااش من منزلة بلا مقام
قتلو عطفة الرغبة
جلبو لينا القال و لقيل
ف كتف سوق عام
على قرد ميمون دارت مندبة
و لهيه گطعوا رحم و ددم يسيل
قرراونا حرب لسقام
حرربونا بلحقد و لغضبة
محقاق الحق اهبيل
تهودات فلسطين لا من قام
قتلوا الهمة و حرقوا الرغبة
بننجوا شهامة هاد لجيل
التاريخ نظم مواقفو كل نظظام
تخانت بلغدر الصحبة
تطفف الميزان و لكيل
نعد الفقر والجهل بلرقام
فبلادي كثرات الغربة
معدود المواطنة هميل
قام الظلم من نعاسو و قام
نحتافلو بعام النكبة
فررق الورث كل دليل
صحيح الحق مهدام
كلهو دين و غلبة
و ظالم لعباد خليل
كثر تشعويد كل نججام
يحطب لحرام بكذبة
و شريف لمقام دليل
يحسن للوقت كل حجام
موسو و زيزوارتو الرحبة
تذبح مخصوص الوقت عليل
نزغرت بلسان مقطوع نممام
يفررج كل صمك مقطوع الرقبة
يمسح دموع الفرحة بلا ليل
يتنههر ف نهار سبحوا غيام
شتاه تاغنجا عطلوها طلبة
يتسنناو حزب الصباح بالترتيل
فوق كركور قلب كل مضيام
يجوود دموع النفس لمعذبة
ف سطل متقوب قاعو يسيل
يجمع لاربعية ف لاربعة الى دام
يشرشم الما يهررس القصبة
الجمع ف سوق النسا يقططع لحزام
يطيح سارية تحمل لحمل الثقيل
يقتل النخوة و لرض الخصبة
و الدوام عل دوام يثقب الرخام

الإدريسي رحال