عبدالله التويس أبوفيروز

***

غير.......... داوي
-----------------------

كنت نْكَدّبْ
تشْرق الشمس 
من ڭفاها
ونڭول
علاش لْ ڭمرة
الليلْ .. اخداها
لِّيام تَرعى ف لموقف
تراري بالضحكة
والطّيب بْكاها
لحلمة سرّات
مع نجوم لبرڭية
واطريق حنات
قبل لعيد
امشات لفرارة
مع السّروية
ها اكتاب لغايب
اتّفتح
واتّنْكسْ علام اشهادة
اتّرعَة تْراري بالباب
ؤلقبيلة تحرث
ف عرس لْكدّاب
ؤ كلها باغي يْفلّح
اتكمشت لَرْض
ف قبضة الجوع
وشهوة لغرامة
ابياض لڭنازة
مْزيّنة لكفن
اتّدفن لعياط
ف بطانة الروح
وبقيت لاغي
نصقسي سوالف لعقل
ونكرّرْ ف اللوح
ديك الشايطة من لعزو
يلا كتاب
واتْفَضْحت دموع لْميتة
تَلْقى ديك
لفتية فين تروح
اشكون باع
الظل من تحت اجناح
واشكون
اسْرق وزيعتي
من اشواري
شكون لّي باقي داري
وهاد لَبّاخخخ
يخرج اسخون
من لْڭلْب لبارد
راحت الشمس
ف عين لعكّاز
وبقيت انا ف الليل
شارد
بين هاكّا وْهوكّا
هو يڭول اظلام ديالي
وانا نڭولو
سوّل لڭمرة وانجوم
ونزيدك التسوال التالي
واش داك النور
اقديم ولّا بالي

البوهالي : 2017.12.03