Bazin Bazin

***

بياضك يا حروفي
كان ذهب
تسرسب من عمري
وقات/سكات
سكات كنت ناويه غوات
لحگ حلگي وبهات
...
وبياض الورقة
ديك العزبة
...
كان حاجتو ف دم
يخدم
سربيس القتيلة
كان مبداه خو /خوه
شعلوا بالدم لفتيلة
وبقا دم يدي الدم
ف كل ليلة
ت لقاع لقبيلة
وباقي يتسقطر...
..
كان حاجتو ف دم
فرحان
ف خزانة ...دبيحة
غيطة وطبل
وسروال
رشم
لدوك گايلين بالفرحة:

هانتوما لعزارا لتگولوا هجالة

دم يتسقطر
من لقلم
دار المنجل خدمة
حش الشوك من طریگك
دار ليك عش/والدة
فين تكون
تكون وتكون منك الكاينة
واللي شافك وقراك
يترحم على من قراك
ك گال الزجال
عل گد الحال
الكلام شابه مولاه
حلال
حلال ...حلال ...حلال...
إلا تشرگ ليك حلاوة هاد لكلام
ولكلام نقرة حايلة
حلال ...حلال...حلال...
على داك الطير/بوعميرة
سارق حروف كانت ف لگايلة
وكانت گایلة
عل الضر اللي بينا
وعل الجرح غارگ فينا
وعلى اللي گلت أنا هادو هوما :
خلاني
وعلى اللي ف ساعة حزة...
زاد و خلاني...

بزين*2