Wafaa Oum Hamza Jlida

***

***نڭول كلمتي ***

اش داني لهاذ لبحر
وهوايش الغوص
ف عومي هاجو 
آش داني نهضر
ومركبي بلا مجاذيف
تايه بين مواجو
نتلاطم
والجهد ضعيف
كل مانجي نطلع
نلاقني نحتل
وبركان عجاجو
يجرني ليه
وأنا اللي
ظنيتني نعرف نعوم
نقرا كفوف السما
ونفك أسرار النجوم
لقيتني قطرة
تلعب بها مواج لهموم
موجة تكبني ف موجة
ؤ ف لساني لحرف اعثر
بغى ينطق
يشهق
من عروق جوفي
يزهق
اش نعرف انا ف هذا من ذاك
فين نلاقني هنا ولا هناك
تلفت بين خطوات حالي
سحت ف مداد لحلمات
نجري ورا خيالي
نقلب عل لمعاني اللي فيا ركدات
طمرت أسراري فبير ظلامي
وشعلتني عافية بلا دخان
تالفة بين اركان
نقلب علي
وهاهي ذاتي
ترقعني بخيوط الروح
ف ميزانها تعبرني
تخبرني
فين مالت الكفات
علاش خميرتي
مبغاتش تخمر
حالي يلالي بين ل مناصب
نفجر صباحي
بغيت نكبر
نفكر ف صلاحي
لقيت ليلي ينفرني
يرسمني وشمة بين لمناكب
بقات سوايعي غادا معايا
تحسبني ونحسبها
تسبقني ونسبقها
ؤ فرجوعي
نسمعني قراقب
تقراني خطوط كفي
وانا نغوت
كفي يايامي علي كفي
كوني ف صفي
وبلا ماتحطبني احطب بارد
مايشعل عافية
مايطيب خبزي ف فران

وفاء أم حمزة ج