Nour Abouchama Hanif

******

نْخَرّجْ رَاسِي مَلّْ لوْضَمْ
...
حَطُّو علْ لوْضَمْ رَاسِي
ؤُ بْقَى ظَلّي رَايَة
...
شفْتْ الدّاخلْ ، لْقِيتُو سَاكتْ
ؤُ لْقِيتْ رُوحِي سْخَاتْ بحْدَايَا
...
الشّبْعَة عَنْدهَا سِيفْ مْطَرّزْ
نَقْشُو منْ جُوعْ كرْشِي
كرْشِي فْ عَيْنُو هِيَ لعْنَايَة
...
حَطُّو عَلْ لوْضَمْ رَاسِي
ؤُ السّيّافْ زُوجْ إِيدِينْ
وَحْدَة دَمْعَة ... وْ الثّانْيَة دَفْعَة
الذّمّة كاتْبَانَا رْوَايَة
...
مُولْ الذّمّة شَادْ فْ كَفّو سَارُوتْ
ؤُ السّارُوتْ لَحْمُو نْحَاسْ
شْكُونْ شَدْ بِيبَانْ النّاسْ
ؤُ حَلْ فْ سْواكْ لغْبِينَة
شْرَاجمْ الرّيحْ عْلَى عْسَلْ لغْوَايَة
...
شْجَرْنَا ، بَاغِي يِحَدْ عْطُونْ الرِّيحَة
ؤُ الضْبَابَة ، حَالْفَة تْغَطِّينَا جْرِيحَة
تْوَكّلْنَا قَهْرَة ، مَلحْهَا وَسْوَاسْ
ؤُ حْلَاوتْهَا خَازْنَة سَرْ لحْكَايَة
...
نسْكُتْ أنَا ، تسْكُتْ نْتَا
نْلبْسُو سَلْهَامْ دَافِي
نسْخُنْ أنَا ، تسْخُنْ نْتَا
تْـڭُولْ فِينَا مْرَمّةْ لْوَقتْ " صَافِي "
نضْحَكْ أنَا ، تَضْحَكْ نْتَا
تَضْحَكْ عْلِينَا لقْوَافِي
مْطَرْزَانَا سْكَاتْ مْزَوْقَانَا وْصَايَا
...
ملّي زْوَاقْنَا بْهَاتْ طْرِيقْنَا وَلّاتْ شُوكْ
شُوكَة راشْڭَـة ؤْ شُوكَة رَاڭْـدَة
طَارتْ مَنّا زْنَايْـڭْ الرْبِيعْ
صُورةْ الرّوحْ صَارتْ كَسْداتْ
ؤُ لْكَسْداتْ ، رْمَادْ لمْرَايَة
...
لْكتْبَة فِيهَا بَيْضَا ، مْدَادْهَا مَجْرُوحْ
صَلْصَالْهَا ، حْيُوطْ سَمّاعَة
ؤُ سْمَقْهَا ، كْفَانْ مَنّاعَة
مْشَى لْمَعْنَى وْ بْقَى الظّلْ
يكْتبْنَا سِيرَاتْ مْرَضْ منْ عُوّايَة
...
لُوحْ عْلَى لُوحْ عْلَى لُوحْ
أنَا نْبُوحْ ، نْتَا تْبُوحْ
سَارُوتْ النْحَاسْ ، بَاقِي عَسّاسْ
سَادْ سَدّة ، شَادْ شَدّة
لْبَارحْ ، لْيُومْ ؤُ غَدّا
شْكُونْ يْعَمّرْ سْكَاتْ الدْوَايَة
...
أنَا فَرْدَة ، نْتَا فَرْدَة
وَاشْ نمْشِي أنَا ، و لّا تمْشِي نْتا
وْ لّا بْزُوجْ نْكَتْبُو خَطْوَة
تَرْجَعْ دِيكْ الرّوحْ نَخْوَة
نْخَرّجْ رَاسِي مَلْ لوْضَمْ
أنَا نفْهَمْ ، نْتَا تفْهَمْ
يكْبَرْ لْمَعْنَى ، تْولّي لُوغتْنَا هَمّْ
تْصِيرْ هِيَ لَبْدُو ، هِيَ لَخْتَمْ ...
تْصِيرْ هِيَ ... عَزْ لْغَايَة
...
نون حاء