بقلم الاستاد عز الدين الشدادي

ملحوظة : قْبَل مَا تقْرَا نطَق الشهادة .

مقطع من نص " أَنَا ميِّت "

جَانِي الموت البارح
بْدَا يلاغيِني عْلَ الحياة
قالي :
قْبَل مَا نكون سميتي الموت
كُنت حياَة
و كُنتِ أنتَ ذِكْ ساعة باقِي
مَتْولدتيش
كاَن إحساسْ غريب نشوف الموت
كيدوِي ليكْ عْلَ سيرتو الذاتية
كَيرسم ليك ملامح طفولة مَ عشهاَشْ
و كَان غريب نحَس بيه ،
حيث مَ شفنا منو غَ العزو

كَان كيدوِي وبيني وبينو
مسافة دْيَل الظلام
كُنت باغي ناخدْ معاَه
صورة تذكار
باش يلا مَتْ ؟
يبقى هو ذكرى بلِّي كنت حي
كُنت باغي نسولو عْل الإحساس ،
واشْ كيحس ؟
خَفت يتقرص من لغتي
و ينعتني بقليل التربية
كَان كيشوف فيَّ
بلا عينين
كيحسب كل كلمة كينطقها الحلم
كَان كيغمز الحياة ،
كيقولها عليَّ " ما دِّيش عليه راه ميِّتْ "
و هذ ش لكيقول راه غِ هذيان
كُنت نسمع الحياة
كتجاوبو بصيغة الاستفهام ؟
و أنت يا الموت ، حي و لا ميت ؟
كان الليل ،
كيتدخل بيناتهم باش يفك النزاع
و كنت أن كنتساءل ، كيفاش أنا ميت ؟
و كنسمع ،؟
كيجاوبني الجزء العاقل من النفس
كَدَّافع عل حقك في الوجود
مَ راضيش تقول :
أنا حي

- عزالدين الشدادي -