Green Stophe

******

طاح الحمار

--- 0 - 0 ---

طاح الحمار
تهدم القيطون
اتفلق الراس
اخرج المخ
ايسول في السوق
على مولاه اشكون
واش باقي حي
ؤ لا ميت
شي اعرف مولاه
اهرب يسحاب راسو
كgدم لوتاد
ؤكان حيلة وسباب
ؤ شي يسحابو باغي يتخلص
في دين المرحوم
ؤ شي اتحوط اعليه
خايف من الدم المغدور
ليهزو في رجليه
ؤ شي شد ليه من ايديه
نعتو الطريق فين يلقاه
ؤ شي نصابة
غا حاضينو من ابعيد
تبعوه تا اوصل
اتحازوا اعليه
ؤملي اتنصص الليل
حلسو لحمار
وجمعو القيطون
والركايز ولوتاد
والحصيصة اللي جامع
وخلاوه مع الخشبة
في الخلا
لجابش الله
اللي ايدفنو و ينعيه
شاف تا اعيا
ؤ ملي اعرف
اللي يبغيه
من اللي ما يبغيه
انعس نعسة الميت
وجر لغطا اعليه
وعطاها لشخير
اللي ايجيب الشفارة من ابعيد
لذاك الراس اللي ولا اغريب
اتحاما الزلط
امعا لبخل اعليه
سخفوه ؤ كتفوه
ودوروا القجمة اعليه
ؤ هو من افعايلهم
ما اتلا صاب من لكبر
لا اللي ايداويه
ولا ايواسيه
حسبوه خرف
ؤ هو اشرب الحكمة
ملي احتاج اللي يتصنت ليه
ما لقا غ اللي باغي يضحك اعليه
اينسي بيه الوقت في الحلقة
و يتسل ويخليه
ابلاما ايروف اعليه

بقلمي

يوم الخميس 25 يناير 2018